Este 24 de setembro abre a súas portas a nova edición da feira de emprendemento Pont-Up Store
xoves, 23 de setembro do 2021
Este
venres 24 de setembro ás 11,15 horas inaugúrase o Espazo
de Emprendemento Pont-Up Store 2021, promovido polo Campus Crea
de Pontevedra (UVigo) coa axuda do Concello de Pontevedra, como
patrocinador principal; e o apoio da Deputación. O acto terá lugar
no espazo central da carpa instalada na praza de España de
Pontevedra. Intervirán Miguel Anxo Fernández Lores, alcalde do
Concello de Pontevedra, Pedro Figueroa Dorrego, director do Pont-Up
Store, Jorge Soto Carballo, vicerreitor do Campus, Manuel González
Martínez, deputado provincial e María del Carmen Fernández
Pena, directora territorial de Pontevedra de Abanca.
Ao
finalizar as intervencións, realizarase unha presentación do
dixital_pontup, iniciativa virtual desenvolvida pola empresa
Xeométrica (grupo Cotarena). De 11:45 a 12:30 horas as autoridades
farán unha visita institucional ao recinto da feira de emprendemento
e innovación Pont-Up Store, cuxo programa de actividades estenderase
até o sábado mostrando propostas que non puideron darse a coñecer
debidamente na pasada edición e outra ducia de emprendementos a
maiores que tiveron afouteza de iniciar a súa andaina en plena crise
pandémica.
En
total amosarán os seus achados 40 empresas que destacan pola
innovación e a creatividade das súas propostas; o que se acompañará
dunha completa programación de actividades (presentacións,
obradoiros, demostracións, charlas) arredor da cultura emprendedora
e, por primeira vez, un espazo virtual denominado dixital_pontup,
que “permitirá vivir o encontro e acceder aos stands de
xeito en liña, e que continuará activo máis alá do evento”,
informaron os participantes na presentación celebrada este martes
21.