Esta semana abre as súas portas o Museo Interactivo da Historia de Lugo
mércores, 21 de novembro do 2012
Este xoves formalízase
a inauguración oficial e definitiva dun espazo de lecer e
divulgación galego que nos colle de preto en Código Cero, non tanto
polos contidos que achega, aínda que tamén, como polos formatos e
feituras elixidas. Falamos do Museo Interactivo da Historia de Lugo,
o MIHL, unha das grandes apostas da cidade en materia de difusión do
coñecemento e de convocatoria creativa e innovadora para a
cidadanía. O museo, que incluíu un orzamento de 10 millóns de
euros, está emprazado no parque de Frigsa, onde xa mesmo antes da
súa apertura foi obxecto de varios recoñecementos do plano
internacional pola orixinalidade da proposta dos arquitectos
Nieto-Sobejano.
O recinto, algo máis que
un continente ou receptáculo de obras e exposicións, estará aberto
tódalas tardes. De feito, achégase como un todo o edificio e a
contorna-parque na que se insire e na que subxace (unha parte do
museo está soterrado baixo o parque da Milagrosa). O museo abrirá
as súas portas este xoves cunha mostra colectiva de arte
contemporánea galega. Segundo
informa o Concello de Lugo, impulsor do proxecto, estamos ante
unha iniciativa innovadora dende tódolos puntos de vista: no que
atinxe ao plano arquitectónico e no que se refire á súa vertente
puramente museográfica (primarán as novas tecnoloxías da
información e o coñecemento como materia prima e discurso, o que
suporá que sexa un edificio pioneiro en Europa). O museo conta con
locais para exposicións temporais, salón de actos, biblioteca,
ademais de café, tenda, administración, etc. “É de
salientar”, engade o Concello, “que o sistema
enerxético do edificio farase por medio de caldeiras
de biomasa, o que evita o emprego de enerxías non
renovables e favorece a súa sustentabilidade”. O
deseño do museo, por certo, está inspirado na Muralla, simulando
unha paisaxe vexetal con torreóns.