Espállase a teima de ofrecer en Internet diplomas falsos

O Observatorio de Internet, con sede en Barcelona vén de alertar da presenza de máis de medio cento de sitios web en España que agochan fraudes ou enganos en materia educativa, ó por á venda diplomas e titulacións falsas ou ofrecer estudos en centros superiores inexistentes ou clonados de outros reais.
En referencia a isto, a axencia EFE informou hoxe de que por uns 250 euros, pódese comprar actualmente un título na Rede, o que supón un fraude educativo a nivel internacional que lle afecta xa a centros como a Universitat de Barcelona, a Carlos III de Madrid ou a Politécnica de Sevilla, posto que xa se están a empregar os seus modelos e selos para compulsar os falsos diplomas.
O director do Observatorio, Francesc Canals asegurou que “se trata de auténticas fábricas de diplomas” que constitúen un delito tanto para a persoa que os solicita como para os sitios que falsifican a documentación.
Na actualidade estes portais destacan polo seu alto nivel de profesionalización e por ofrecer a posibilidade de escoller a universidade, a titulación e incluso o selo do diploma que se desexa.