Enxeñaría Aeronáutica e do Espazo (UVigo) colabora na nova edición de Galiciencia
xoves, 20 de abril do 2023
Galiciencia,
a feira científico-tecnolóxica da nosa mocidade promovida polo
Parque Tecnolóxico de Galicia (Tecnópole) vai contar este ano coa
imporante colaboración da Escola de Enxeñaría Aeronáutica da
Universidade de Vigo, amosando ás novas e novos investigadores como
funcionan os drons e as posibilidades que ofrecen, como se acada a
propulsión dos foguetes ou como se desenvolven os minisatélites.
Esta 18ª edición da Galiencia vaise celebrar o 10, 11 e 12 de maio
coa temática Aeronáutica e Aeroespacial. Na nova
convocatoria tamén colaborará o Instituto de Investigación
Universitario en Física e Ciencia Aeroespacial, situado (como a
Escola de Enxeñaría Aeronáutica) no Campus de Ourense.
A
Escola vai aportar varios membros do xurado encargado de elixir os
proxectos gañadores desta edición. Ademais, instalará un stand
propio no que alumnado do centro amosará aos participantes en
Galiciencia como funcionan os drons, a propulsión de foguetes, o
desenvolvemento de minisatélites…, ao tempo que se lles facilitará
información sobre o que se pode aprender no grao en Enxeñaría
Aeroespacial, tendo en conta que se trata dunha industria punteira en
España e na que Galicia está a realizar unha aposta moi importante.
Nieves
Lorenzo, profesora e secretaria da Escola de Enxeñaría Aeronáutica
e do Espazo da UVigo, ademais de responsábel de Igualdade do centro,
salienta que están a traballar moito na incorporación das mulleres
ás enxeñarías, a través da promoción, visibilización e posta en
valor de referentes femininos no eido STEM. Como resultado, este
curso o grao en Enxeñaría Aeroespacial logrou que o 45% do alumnado
de primeiro ano sexan mulleres. “En toda España non hai un grao en
enxeñaría técnica con estas cifras, están todos por debaixo do
20%”, comenta, engadindo que “o grao de Enxeñaría Aeroespacial
é moi interesante xa que forma profesionais capacitados para exercer
nun sector emerxente”. Segundo apunta Nieves Lorenzo, a industria
aeroespacial ten pouco máis de 100 anos pero “ten impulsado moitas
das revolucións tecnolóxicas do século XX, as súas innovacións
favorecen ao conxunto da sociedade; só temos que pensar na enorme
cantidade de obxectos que na actualidade empregan semicondutores,
materiais compostos e moitas outras innovacións desenvoltas
principalmente por esta industria, xunto á realización de misións
científicas”.
Pola
súa parte, o profesor da Escola Higinio González destaca que “o
sector aeroespacial permite, por exemplo, a mobilidade
intercontinental de persoas e mercancías en tempos reducidos, a
observación da Terra desde o espazo para realizar predicións
meteorolóxicas, a navegación con dispositivos móbiles, as
comunicacións en lugares remotos, a vixilancia de fronteiras ou a
realización de operacións complexas de busca e rescate”. Remarca
que “a industria aeroespacial, pioneira desde un punto de vista
tecnolóxico, é un dos xeradores de PIB máis importantes de Europa
e España (6.8% do PIB industrial español en 2020), pero enfróntase
a grandes retos que debe superar nos vindeiros anos como a
integración de aeronaves tripuladas e non tripuladas no espazo
aéreo; a aviación con cero emisións; ou os retos que comporta a
explotación comercial do espazo, como o abaratamento dos lanzamentos
ou a xestión do lixo espacial, entre outros”.