Entretiendas.com ofrecerá liquidacións do Centro Comercial Aberto de Ourense
mércores, 19 de xaneiro do 2011
- O delegado territorial da Xunta en Ourense, Rogelio Martínez, na presentación da páxina web entretiendas.com
Esta mañá presentouse
en Ourense a páxina web Entretiendas.com, unha canle de venda en liña para
produtos doutras tempadas a prezos moi vantaxosos para o cliente de ata un 70%
de desconto con produtos de máis de 250 establecementos ourensáns de diferentes
sectores empresariais, asociados a Ourense Centro, que atopan neste espazo unha
nova canle de distribución no que se conxuga a tradición e a innovación
solucionando a acumulación de excedentes nos almacéns.
Durante o acto de
presentación, o delegado territorial da Xunta en Ourense, Rogelio Martínez, amosou
o compromiso do goberno galego con este proxecto financiado a través de iMit (Iniciativas
de Modernización e Innovación Tecnolóxica).
«Sen dúbida
este é un proxecto moi interesante e estou seguro que acadará os éxitos que merece.
O comercio tradicional ten que renovarse e ser competitivo e as novas
tecnoloxías son fundamentais para consegui-lo. Grazas a esta nova páxina web
gañan os comerciantes porque se mellora a competitividade dos seus comercios e
gañan os usuarios porque teñen acceso a produtos de calidade doutras temporadas
a prezos moi ventaxosos», asegurou o Delegado Territorial.
Durante a súa
intervención, Rogelio Martínez, explicou que a nova lei permite deseñar «novas liñas de actuacións que contribúen á
modernización e ao desenvolvemento integral do sector comercial en Galicia,
fomentando a incorporación da innovación e das novas tecnoloxías, mellorando a
capacitación profesional e incrementando a competitividade do comercio galego».
Neste sentido, Martínez
lembrou que a Consellería de Economía e Industria destinou 3,33 millóns de
euros á dinamización de Centros Comerciais Abertos das catro provincias
galegas, a través das liñas de axuda específicas enmarcadas dentro do Plan
Ágora - Agora re-Comercia, dotado con case 130 millóns de euros.