Entregados os certificados aos participantes na formación turístico-tecnolóxica da Deputación de Lugo

O presidente da Deputación de Lugo, José Tomé Roca, xunto coas deputadas Pilar García Porto e Ana González Abelleira, entregou os certificados de realización da acción formativa Promoción e Comercialización de Produtos e Servizos Turísticos Locais que a institución ofreceu de balde aos concellos da provincia dentro das súas medidas de apoio ao turismo e a hostalería. Persoal de 40 entidades locais realizou esta formación en liña de 100 horas de duración, destinada a dotar aos concellos de máis ferramentas para crear, desenvolver e xestionar produtos turísticos.
En concreto, o programa tivo catro eixos: mercadotecnia turística, proxectos de comercialización de produtos e servizos turísticos locais, o sistema de relación cliente-empresa no sector da hostalería e o turismo; e a utilización das Tecnoloxías da Información e a Comunicación (TIC) na promoción do destino e para a creación e promoción de produtos turísticos no entorno local.
O presidente felicitou e agradeceu a participación dos concellos nesta iniciativa, que José Tomé enmarcou na colaboración que a Deputación está desenvolvendo para apoiar a recuperación da economía da provincia fronte ao impacto da pandemia.