En marcha unha web con xogos educativos para fomentar a saúde bucodental
venres, 9 de decembro do 2011
Os videoxogos teñen
amosado, dende sempre, un amplo potencial educativo. En realidade, ten a súa lóxica
que así sexa, non hai máis que pensar no moito que se exercitan determinadas
capacidades intelectuais, físicas e sociais con todo tipo de accións lúdicas
tradicionais: a mensaxe chega mellor. Este é o alicerce de Sen carie, un material
multimedia habilitado polas consellerías de Sanidade e Educación onde poderemos
atopar, entre outras cousas, unha variada listaxe de xogos educativos adaptados
aos diferentes niveis de educación infantil e primeira dándose conta, de
maneira lúdica, dos piares da saúde bucodental para nenas e nenos.
A web, amais de
outras opcións multimedia, inclúe un apartado chamado A boca e o seu coidado onde se informa, a través dunha completa guía,
sobre algunhas cuestións chave sobre o coidado dos nosos dentes, cuestións que “serven para actualizar os coñecementos dos
docentes ou dos pais e poden ser utilizados como material de consulta dos
escolares”. A páxina tamén inclúe unha sección para o profesorado (Educadores), que achega os principais
pasos a seguir por parte dunha titora ou titor no que se refire a normalizar
entre a rapazada os principais métodos de hixiene bucal.