En marcha unha revista galega feita especificamente para iPad: Achtung!
martes, 3 de xullo do 2012
Temos unha nova
publicación de raizame galega: Achtung! Dáse a circunstancia de que
nin nos contidos (creatividade de vangarda, alicerce cultural dende
unha óptica “irreverente”) nin na forma é unha revista ao uso.
De feito, segundo nos contan os seus creadores, trátase da primeira
revista para iPad feita dende a nosa terra. A publicación, artellada
en base a reportaxes, entrevistas, opinión e información
internacional e/ou cultural, vén da man dun grupo de profesonais da
comunicación encabezados por Óscar Sanluis e Pablo L. Orosa,
comprometidos con revolucionar non só o noso panorama comunicativo,
senón o de alén de tódolos nosos puntos de vista.
A revista, que xa está dispoñíbel na App Store, semella un reto en si
mesma: feita dende a para a modernidade TIC pero con vontade de que
sexamos quen de lela de vagar. Segundo os seus autores, as grandes
historias ás que dá acubillo ben merecen que lles dediquemos o noso
tempo. Un dos grandes piares da publicación é a información
internacional, contándose para esta cobertura con corresponsais en
países como Francia, Marrocos, Venezuela, México o Turquía. A
cultura, como dixemos, é tamén un contido esencial da publicación,
abranguéndose múltiples manifestacións da mesma, como literatura,
cinema, TV, música ou pintura. Tamén incorpora un espazo para
creadores, achegando unha novela por entregas e propostas
fotográficas ou artísticas. O formato para tablets
inclúe material adicional (galerías, vídeos, enquisas, redes
sociais) fornecendo aos lectores “dunha
experiencia interactiva na que estes constitúen a parte activa da
revista”. Esta estará dispoñíbel
cada seis semanas na App Store, e en versión de escritorio, para
PC e Mac. Para complementar estas achegas, púxose en marcha unha
web, achtungmag.com,
actualizada decote con entrevistas, apuntamentos culturais, propostas
gastronómicas e turísticas.