En marcha unha comunidade para a autoedición de fotos inspirada en Bubok: a comunidade Arttística
martes, 17 de decembro do 2013
Esta semana presentouse
un novo proxecto de raizame estatal e obxectivos de alcance
internacional para facilitar o camiño de quen queira amosar perante
o mundo as súas fotografías e de paso xerar beneficios. O proxecto
chámase Arttística, e
trátase dunha comunidade de Internet para a publicación e venda de
imaxes. Permite a calquera persoa, ben sexa fotógrafo profesional ou
afeccionado, divulgar as súas creacións de xeito gratuíto ou mesmo
vendelas a través de variados formatos e materiais (o 80% do
recadado é para o autor). A plataforma bota man do sistema de
impresión baixo demanda, polo que o artista, sinalan os responsábeis
da iniciativa, nunca perde cartos, “xa que soamente se imprimen as
fotografías que pedisen os compradores”.
Arttística é un
proxecto de Bubok, servizo para
autoedición de libros do que colle prestado o seu espírito, pero
adaptándoo ao eido da imaxe. Segundo conta Sergio Mejías, director
xeral de Bubok, “a autoedición en calquera das súas
manifestacións é o futuro, e a nosa aposta é ser líderes na
autoedición cultural, ofrecendo as posibilidades para que os autores
xa non estean suxeitos a asinar cunha editorial ou unha discográfica,
senón que teñan un abano amplo de posibilidades para
autoxestionarse, e Arttística é un paso máis nesa dirección”,
sinala.
As persoas que queiran
publicar e vender as súas fotografías só ten que inscribirse na
web, “de forma totalmente gratuíta”, publicar as súas
fotografías (o número é ilimitado) coa posibilidade de polas á
venda en variados formatos e materiais: brillo, mate, papel, papel
laminado ou tea, con tamaños que oscilan entre os 30 x 30
centímetros e 1,5 x 1,5 metros, “permitindo así a posibilidade de
imprimir desde pequeno álbums a grandes cadros e pósters”,
engaden os creadores deste servizo.
E conclúen: “Ademais,
para aquelas persoas que xa teñan as súas fotografías nunha conta
de Flickr, Arttística conta cunha funcionalidade que permite
importar directamente as fotografías de Flickr a Arttística de
forma sinxela para poder vendelas”.