En marcha un proxecto para materializar un Código de dereito galego en liña
xoves, 2 de xaneiro do 2014
- Exterior do Parlamento de Galicia en Santiago
A Universidade de
Santiago, o Parlamento de Galicia e máis o Goberno autonómico
anunciaron os días pasados que van
colaborar para dar forma a un Código de dereito galego consolidado e
en liña. Un Código, sinalou a institución académica
compostelá, que se publicará en Internet e que será de acceso
gratuíto. O proxecto é froito dun convenio asinado entre as tres
ditas entidades e máis AMTEGA, a Axencia para a Modernización
Tecnolóxica de Galicia. Segundo engade a USC, “abranguerase toda
a normativa autonómica, desde o comezo da Autonomía ata a
actualidade, dende as leis e decretos a normas de rango inferior que
conteñan información relevante”.
O Código inserirase nun
portal de índole xurídica, arestora en desenvolvemento, que dará
acubillo a datos relevantes para o labor cotián dos profesionais do
dereito, con ligazóns a outras bases de datos e boletíns oficiais e
con novas sobre a actividade lexislativa autonómica e estatal.
Polo que atinxe ao
papel que vai despregar o Parlamento de Galicia, centrarase en
boa medida na elaboración do Código proporcionando “a
infraestrutura e os recursos que podan ser precisos, facilitando o
acceso aos seus fondos e arquivos documentais en materia lexislativa
e poñendo a disposición do proxecto os seus servizos xurídicos e
lingüísticos”.