En marcha un novo servizo para introducir nos negocios técnicas dos xogos: Wonnova
xoves, 19 de xullo do 2012
O camiño do real ao virtual tamén ten a súa
inversa. Ou sexa, que non só somos nós os usuarios os que construímos os
escenarios dixitais: estes tamén estende os seus brazos. Nesta liña de
influencia de ida e volta é onde se insire unha nova tendencia-metodoloxía dos
negocios: a gamificación. Este novo
termo (traducíbel se cadra como xoguificación)
provén, como moitos antes, de Estados Unidos, e designa unha mestura de
conceptos e procedementos: xogar como emprender, emprender como xogar. Entre as
páxinas web que se dedican a informar deste novo xeito de facer empresa está Wonnova, que centra unha parte dos seus esforzos
en estruturar técnicas de achegamento aos clientes como un xogo. “En tempos de crise”, sinalan dende a
nova web, “a gamificación constitúe unha
aposta que está a dar bos resultados”.
Como principal vantaxe a ter en conta, a técnica
en cuestión é quen de motivar aos clientes e membros dunha empresa ofrecéndolles
recompensas e desenvolvendo a súa creatividade. A aplicación da dinámica das
consolas ao eidos da comunicación e da xestión empresarial tamén teñen
potencial, informa Wonnova, para resolver todo tipo de conflitos, amais de “achegar máis interacción do cliente coa
empresa, xa sexa a través do fornecemento de información ou de contidos de
calidade”. A empresa en cuestión, que vén da man de José Ángel Cano (un dos
fundadores da plataforma web de emprego Wiseri, onde xa se aplicaron técnicas
semellantes), centra o potencial da metodoloxía en todo tipo de sectores:
formación, automoción, saúde, gran consumo, etc. A ferramenta ten só uns días
de actividade, pero segundo sinala Cano, conta xa co apoio dun feixe importante
de grandes compañías, interesadas en aproveitar as feituras das estratexias das
consolas para desenvolver e, sobre todo, para presentar e distribuír os produtos
de seu. O punto a favor destes métodos é sen lugar a dúbidas a predisposición psicolóxica
que temos para participar en xogos, ben sexa en xogar por xogar ou ben en
tarefas como encher enquisas o descubrir novos produtos e servizos. Como
exemplos de referencia, engádese, están dispoñíbeis propostas de gamificación como Farmville ou Foursquare, este último un servizo de
localización web aplicada ás redes sociais e que, entre outras cousas, permite
emprazar exacta e xeograficamente un trebello fixo ou móbil.Este xogo posibilítalle
ao usuario marcar lugares específicos que vai atopando e ir gañando puntos
descubrindo novos emprazamentos, recompensados logo cunha especie de condecoracións.