En marcha un concurso para os mozos desenvolvedores de aplicacións con vertente social: InnoApps

Falamos agora de oportunidades de lanzamento para aqueles estudantes ou profesionais que teñan boa man coa programación e o deseño e, ademais, pulo solidario. Disto precisamente, de lanzar e de axudar a colectivos en risco, é o do que trata InnoApps, un concurso que reta aos desenvolvedores máis novos a deseñar aplicacións móbiles innovadoras que fomenten a inclusión social. A competición, que comezou a finais do pasado mes, é unha iniciativa conxunta promovida por Huawei, Microsoft e o European Young Innovators Forum (EYIF).
A competición está aberta a estudantes universitarios e profesionais menores de 27 anos que residan na Unión Europea. Esta iniciativa anímaos a afrontar un reto de desenvolvemento co obxectivo de contribuír a unha sociedade con maior grao de inclusión promovendo as habilidades tecnolóxicas, incrementando a participación dixital e fomentando o espírito empresarial entre os mozos. “A través deste concurso”, comenta Leon Sun (presidente da oficina de comunicación de Huawei en Bruxelas), “esperamos atraer o talento novo e ofrecerlles a oportunidade de desenvolver as súas ideas e impulsar o seu espírito empresarial”. Todos os mozos que queiran participar poderán enviar os seus traballos ata o 8 de setembro de 2013. Unha vez elixidos os gañadores, presentaranse nunha cerimonia en Bruxelas durante a Global Entrepreneurship Weed, que se vai celebrar do 18 ao 24 de novembro. O gañador do primeiro premio recibirá 5.000 euros e gozará de soporte na comercialización e promoción da súa aplicación. Os desenvolvedores que acaden o primeiro e segundo posto visitarán o Centro de Innovación de Huawei. Ademais, e xunto co gañador que seleccione o público, accederán a accións de promoción para as súas aplicacións a través da Windows Store de Microsoft. O seis finalistas recibirán formación técnica e de mercadotecnia nun obradoiro en Bruxelas, así como promoción nas páxinas web dos organizadores.
Lembrar que o European Young Innovators Forum é unha fundación centrada na innovación entre as novas xeracións de Europa. O seu fundador e presidente, Kumardev Chatterjee, comenta ao respecto do concurso que “é de vital importancia para o futuro de Europa e para saír da crise actual, dotar aos mozos de oportunidades concretas e apoiarlles para que asuman riscos en prol da innovación e o emprendemento”.