En marcha un centro de traballo para que os formadores se formen en TIC colaborativas
luns, 9 de xullo do 2018
Unha nova aula innovadora
para formar a formadores, en innovación e tecnoloxías docentes.
Este
é o cometido principal do Workspace, espazo para o intercambio
de coñecemento e capacidades posto en marcha pola Consellería de
Cultura e Educación no Centro Autonómico de Formación e Innovación
(CAFI). O centro, un laboratorio de ideas, bebe das fontes das
filosofías do traballo cooperativo e mesmo do movemento Maker.
Nel, o profesorado gozará
da oportunidade de idear proxectos para poñelos en práctica antes
de aplicalos á dinámica da aula cos seus alumnos.
Terán ao alcance da man
(entre outros recursos) impresoras e escáneres 3D, kits de robótica,
programación na placa libre Arduino, robots e gravadoras-cortadoras
láser, entre outros moitos aparellos para desenvolver propostas,
perfeccionalas e compartir coñecementos.
Esta é unha das
principais novidades docentes que se inclúe no Plan Anual de
Formación do Profesorado 2018/19 de cara ao vindeiro curso que hoxe
presentou o conselleiro de Cultura, Educación e Ordenación
Universitaria, Román Rodríguez.
O conselleiro cualificou
de “totalmente revolucionario” o Workspace presentado esta
mañá, “unha aula integral na que se xuntan unha zona de traballo
e outra para afondar en novas metodoloxías de ensino”. Segundo
fixo saber, a previsión é que os Centros de Formación e Recursos
(CFR) da Coruña, Lugo, Ourense, Pontevedra e Vigo contén cun espazo
de ensino e experimentación semellante para a formación do
profesorado na súa área competencial. Arestora fica aberta unha
convocatoria para a incorporación de Espazos Maker de xeito
inicial a modo de experiencia piloto en dez institutos.