En marcha o Preguntoiro de software libre para resolvermos as nosas dúbidas sobre as tecnoloxías abertas

A Oficina de Software Libre do consorcio interuniversitario galego CIXUG vén de pór en marcha na Rede un servizo para preguntas e respostas a disposición da comunidade de usuarios de programas de código aberto. Trátase do Preguntoiro, unha achega dende e para o colectivo de usuarios de open source da nosa terra. A idea básica da OSL foi o de cubrir un baleiro importante na nosa comunidade, un baleiro informativo e consultivo que achegue a posibilidade de recibirmos atención e respostas por outros usuarios galegos sobre “calquera tema que teña que ver coas tecnoloxías libres”. Trátase pois dun foro de preguntas e repostas e tamén de debate.
Segundo indica a OSL, o funcionamento do Preguntoiro é ben doado. Trátase de lanzarmos preguntas ou dúbidas e sermos atendidos por xente que ten a experiencia ou o coñecemento axeitado e propio para respondernos. Como é natural, cabe a posibilidade de sermos atendidos por varias persoas, e, como nos lembra a OSL, poderemos facer uso da resposta ou resolución que nos pareza máis indicada e mesmo votala e valorala para que os demais usuarios fagan uso dela. O sitio en cuestión está dirixido a dar servizo a estudantes e técnicos, pero tamén a público en xeral.