En marcha nos concellos de Pontevedra o proxecto para a xestión intelixente dos activos da provincia
luns, 16 de marzo do 2015
A semana pasada organizouse
na Deputación de Pontevedra unha xornada de traballo sobre
depoGAP: Xestión
de Activos da Provincia de Pontevedra. Na xuntanza participaron
arredor de dous centos de persoas: alcaldes, enxeñeiros e técnicos
dos concellos, o presidente do organismo provincial, Rafael Louzán,
e o xefe do Servizo de Novas Tecnoloxías, Amancio Varela, a deputada
Begoña Estévez e máis os expertos e os responsábeis da firma
adxudicataria do proxecto en cuestión. Na reunión, o presidente
definiu o proxecto como “unha decidida aposta pola xestión
intelixente dos bens e activos da provincia”. Tamén fixo saber que
esta semana que comeza unha ducia de equipos de 112 profesionais cada
un comezarán a desenvolver a iniciativa nos concellos da dita
contorna xeográfica.
Como lembraremos, depoGAP é un proxecto de base
tecnolóxica, cofinanciado nun 70 % con fondos FEDER, destinado “a
mellorar os servizos públicos prestados a través da implementación
dun novo modelo innovador de xestión intelixente dos seus activos
provinciais (edificios públicos, instalacións polideportivas e
mobiliario urbano, entre outros) mediante a colaboración dos
concellos e a participación dos cidadáns na xestión municipal”,
sinalou no seu día a Deputación.
Na xuntanza da semana pasada, o presidente salientou
que o proxecto “dotará os concellos de información que lles
permitirá optimizar a xestión dos seus activos e lles axudará a
tomar decisións eficientes sobre eles”. Subliñou tamén que
“fomentará a participación dos cidadáns na Administración e que
lles permitirá adquirir o coñecemento necesario sobre a eficiencia
enerxética, para diminuír así o gasto e o impacto medioambiental a
través do uso eficiente dos activos públicos”.
Pola súa banda, Amancio Varela fixo saber que
DepoGAP abrangue o desenvolvemento dun inventario de activos nos
concellos e na propia Deputación; amais da integración e posta en
marcha dunha plataforma tecnolóxica á que terán acceso os
concellos para xestionar os seus activos, un cadro de mando integral
para facilitar a toma de decisións municipais, e un portal e unha
aplicación para dispositivos móbiles que permitan a participación
cidadá. “Ademais”, dixo, “tamén inclúe a realización de
probas piloto de eficiencia enerxética sobre diversos ámbitos coma
a iluminación pública ou as infraestruturas deportivas, o que
xerará o coñecemento necesario para mellorar a súa xestión”.
Segundo engadiu o xefe do Servizo de Novas Tecnoloxías, con DepoGAP
"a provincia de Pontevedra será a primeira Administración
intelixente de España".