En marcha a web do proxecto que amosa o antes, o agora e o despois da nosa música: Punto e Volta
luns, 20 de febreiro do 2017
A
Bolsa Nacho Mirás de Novos Xornalistas, iniciativa
que rende homenaxe a un dos comunicadores máis senlleiros e
loitadores da nosa terra, segue impulsando proxectos de gran
interese. Se
hai uns días falabamos en Código Cero da posta en marcha de do mapa
dixital dos medios galegos, hoxe informamos do despegue
definitivo de Punto e Volta, proxecto audiovisual artellado por catro
xornalistas e dirixido a “explorar as mudanzas na música e o baile
tradicionais de Galicia a través de pequenas entrevistas”. Segundo
nos conta hoxe o Colexio Profesional de Xornalistas de Galicia,
entidade impulsora da Bolsa Nacho Mirás (xunto con Abanca), Punto
e Volta estreou web de seu.
A
través dela xa podemos acceder ás primeiras entrevistas xeradas ao
abeiro do proxecto, acompañadas de vídeos de pezas musicais e
bailes. Segundo engaden os Xornalistas de Galicia, as persoas
enquisadas
forman parte da historia e do presente do patrimonio cultural galego,
“alumnas/os,
educadoras/es ou garantes da cadea de transmisión oral”, persoas
de todas as idades que a partir de xa teñen un espazo web dispoñíbel
para dar conta do seu coñecemento, da súa experiencia e do seu
legado.
A
páxina web de Punto e Volta divídese en dúas seccións. A primeira
é a das entrevistas, artelladas
en vídeos curtos clasificados por temáticas, que en
palabras dos xornalistas impulsores da plataforma
“tentan dar resposta a distintos interrogantes como a evolución da
cadea de transmisión da cultura popular galega, os cambios
experimentados no
ensino
da música e do baile tradicionais, os roles de xénero no baile ou a
traxectoria vital das persoas entrevistadas”.
A
segunda sección da web é “a das pezas e bailes coas que estas
persoas axudaron a enriquecer o proxecto”.
Lembrar
que Punto
e Volta é unha iniciativa das xornalistas Olaia Tubío, Alejandro
Gándara, Raquel Pérez e David Fontán.