En marcha Biicode, un sistema intelixente para favorecer a reutilización de software
xoves, 13 de marzo do 2014
- Manuel Arrufat e Diego Rodriguez-Losada, impulsores de Biicode
Estes días soubemos do
impulso recibido por unha nova iniciativa tecnolóxica destinada a
incentivar a fórmula das segundas e terceiras vidas, unha fórmula
que para moitos é o futuro da Sociedade da Información... si ou si.
A particularidade de Biicode,
que é o sistema do que imos falar, é que non se dirixe a propor
novos usos para hardware diferentes ou complementarios con respecto
aos orixinais, cousa á que estamos máis afeitos, senón que o que
se busca é reutilizar software entre programadores. Trátase, máis
polo miúdo, dun sistema intelixente que analiza o código dos nosos
programas para atopar e descargar as dependencias e configurar o
proxecto ou actividade que teñamos entre mans.
Segundo informan os
impulsores de Biicode, a devandita tarefa adoita ser moi tediosa, e
esixe destinar moito tempo a configurar os proxectos por parte dos
desenvolvedores. O sistema, ademais, permite que tomemos o control do
que acontece no caso de sermos usuarios máis expertos.
Polo tanto, estamos ante
unha ferramenta que facilita o traballo dos usuarios individuais e
que, ao mesmo tempo, pon a disposición das comunidades unha
plataforma de código “moi potente para compartir recursos”. De
feito, para reutilizar o código doutros usuarios non é preciso
descargalo, abonda con facer o include dende o código fonte.
Ao mesmo tempo, sinalan os responsábeis de Biicode, “compartir o
noso código con outros usuarios non require nada especial, basta con
executar un comando”.
O sistema está
especialmente enfocado cara a Arduino e RaspberryPi, hardware libre
para favorecer a enxeñaría industrial, robótica ou computacional,
recursos que levan anos xuntando unha chea de seareiros da
electrónica e da intelixencia artificial de todo o mundo e sen que
se lles esixan grandes coñecementos en programación. De feito,
Biicode diríxese tamén a favorecer a concorrencia destes seareiros,
ao encargarse da realizar a compilación cruzada e pasar o programa
ao dispositivo, “todo isto de xeito transparente”.
Biicode é unha
iniciativa recente, e para impulsala os seus promotores lanzaron un
concurso para programadores de C++ en Arduino e RaspberryPi. As datas
de inscrición están abertas até o 6 de abril e pódense presentar
proxectos até o 13 de abril de 2014. O equipo gañador do concurso
levará 1.000 euros e varios kits de hardware, o segundo equipo
obterá 500 euros e aparellos de hardware e o terceiro conseguirá
300 euros máis unha achega de equipamento. O xurado está formado
por representantes de empresas como Google, BQ, Dymotics, Tetuán
Valley, Bricogeek e Biicode, “o cal é unha gran oportunidade para
demostrarmos as nosas habilidades ante eles”, sinalan dende
Biicode.
Sinalar por último que
detrás deste sistema atópase unha start-up do mesmo nome,
unha nova empresa con “gran potencial de proxección”, tal e como
quedou de manifesto durante a terceira edición española da
competición mundial SmartCamp de IBM, cuxa gala final celebrouse o
pasado outubro e na
que Biicode obtivo o recoñecemento á mellor solución tecnolóxica
española “para crear un planeta máis intelixente”.