Empresas, comunidades e investigadores TIC xuntarán forzas na conferencia AtlánticaConf
luns, 30 de setembro do 2019
Os
vindeiros 4 e 5 de outubro vaise celebrar na Facultade de Informática
da Coruña (FIC) a conferencia tecnolóxico-dixital AtlánticaConf,
unha xuntanza que busca ser un novo e referencial punto de encontro
entre empresas, desenvolvedores e universidades arredor coñecemento
TIC. A conferencia, xurdida da unión dunha chea de comunidades de
desenvolvemento tecnolóxico locais, conta co apoio da Facultade de
informática e de varias das empresas máis relevantes do sector
dixital. Inclúe un programa con máis de trinta actividades e coa
participación de outras tantas relatoras e relatores.
A
conferencia estrutúrase en tres espazos simultáneos, cunha ampla
variedade de actividades: máis de 30, entre charlas e obradoiros e
outras/os tantas/os relatora/es de referencia a nivel nacional e
internacional. Ademais, haberá 6 actividades no recanto Open
Space, un apartado no que calquera persoa poderá compartir os
seus coñecementos sobre unha temática concreta, seguindo a
filosofía da tecnoloxía libre.
Quen
pode participar en AtlánticaConf?
AtlánticaConf
está concibida para ser “o gran punto de encontro de Universidade,
empresa e comunidades” e nela teñen cabida perfís tecnolóxicos
de distintos niveis para favorecer o intercambio de coñecemento.
Para iso, o evento ofrece dous tipos de entradas: de balde, para
estudantes, persoas en situación de desemprego e persoas con
diversidades funcionais e motrices, e outra dirixida ao sector
profesional (investigadores, desenvolvedores, etc,... ) cun custo de
18 euros.
As
entradas poden adquirirse a través da web atlanticaconf.com.
AtlánticaConf
nace, en palabras das entidades organizadoras, “como un gran espazo
aberto a todas as tecnoloxías e coa aspiración de ser referencia no
futuro para visualizar o sector galego a nivel estatal e
internacional e atraer talento”. Para iso, as comunidades
impulsoras poñen en xogo “un proxecto a tres anos vista”, no que
desenvolver non só esta fase de inicio, senón tamén as de
consolidación e internacionalización e incrementar o número de
participantes. Para aclarar dúbidas e xestionar reportaxes e
entrevistas, podemos contactar coa organización a través de
info@atlanticaconf.com.