Emprego pon o foco na necesidade de incrementar a formación en TIC
luns, 21 de febreiro do 2022
A
conselleira
de Emprego e Igualdade, María Jesús Lorenzana, e o reitor da
Universidade da Coruña, Julio Abalde, presentaron esta mañá na Coruña as conclusións dun estudo no que se
analizaron 15 sectores económicos estratéxicos para Galicia
(potencialmente xeradores de oportunidades traballo) e 14 tecnoloxías
emerxentes. Segundo fixeron saber, este informe “permitirá contar
cunha estratexia ampla e vangardista” para fomentar o crecemento do
mercado laboral galego. A investigación, en definitiva, identifica
os traballos que o proceso de dixitalización está a transformar e,
polo tanto, “requiren dunha adaptación da oferta formativa”.
En
palabras de Lorenzana, a Consellería buscou con este estudo
“anticiparse” e “dar resposta ás necesidades que están a
xurdir no mercado de traballo”. As conclusións fan necesario,
segundo a conselleira, responder ás necesidades formativas que o
mercado laboral require, ter en conta os sectores nos que os empregos
se van ver máis afectados pola irrupción das tecnoloxías
emerxentes, así como os ámbitos nos que xurdirán novos postos de
traballo e facilitar a cualificación permanente das persoas,
mellorando así, o emparellamento entre oferta e demanda. “É
fundamental impartir unha oferta formativa adaptada ás tendencias en
innovación e aplicación de solucións tecnolóxicas para o
emprego”, engadiu.
O
estudo conclúe que en Galicia a transformación tecnolóxica está a
producirse a diferentes velocidades en función do tamaño da empresa
e está a afectar “dun modo distinto”, segundo a categoría
profesional ou segundo o rol que teña este posto dentro da cadea de
produción. A análise sinala que as empresas, na súa maioría
pemes, “están aínda nunha fase moi incipiente do proceso de
transformación dixital, o que implica que este cambio producirase
nun período de tempo curto”.
O
documento tamén destaca que os postos vencellados ao deseño e
implantación das solucións tecnolóxicas teñen unha alta demanda e
un alto grao de empregabilidade, “polo que a oferta de traballo é
elevada e precisa de novos profesionais para cubrir a demanda
actual”; e indica que as persoas traballadoras que realizan tarefas
repetitivas ou susceptíbeis de ser automatizadas precisan de novos
coñecementos adaptados ao uso das novas tecnoloxías e a adquisición
de novas competencias asociadas á supervisión ou revisión das
tarefas que se roboticen. Así mesmo, salienta que “o labor dos
operarios de produción, con independencia do sector, transformarase
polo que é necesario orientar a formación ao manexo de novas
solucións tecnolóxicas”.
No
informe tamén se di que os empregos relacionados coa toma de
decisións e con procesos de vendas e comerciais tamén están a
sufrir cambios. En concreto, modifícase o uso das ferramentas e
tecnoloxías que se utilizan para analizar datos e tomar decisións,
escoitar a voz do cliente e xestionar equipos presenciais ou en
remoto. Con respecto aos traballos comerciais, a investigación
sinala que deberían comezar a usar ferramentas de Big Data
e análise de voz do cliente “para unha mellor compresión”.
Lorenzana
avanzou que a Xunta ultima un convenio de colaboración coa
Universidade da Coruña para materializar as propostas formativas en
accións reais, unha cooperación que se asinará a finais de marzo,
e unha “sólida liña de colaboración”, cos principais clústeres
implicados na recualificación profesional para comezar a impartir
formación xa ao longo deste ano. A estas actuacións súmase a
Axenda Galega de Capacidades para o Emprego que persegue tamén
identificar necesidades formativas non cubertas no mercado laboral
galego e facelo da man dos axentes socioeconómicos.