El Correo Gallego publica o seu primeiro e-book
luns, 15 de outubro do 2012
O diario El
Correo Gallego quere ser pioneiro entre os medios de comunicación galegos cunha
liña editorial de libros
electrónicos que veñen de estrear con Nuevas
tecnologías, cómo entenderas. Hoy el futuro... ya es presente, de Xabier
Sanmartín Cuevas, que recompila neste volume as súas reportaxes sobre o mundo
tecnolóxico publicadas na sección de Tendencias do xornal compostelán, precedendo
esta serie de artigos cun prólogo do enxeñeiro en Informática e emprendedor
Álex Barrera. O primeiro e-book de El Correo Gallego pode descargarse
de balde en formato PDF, ePUB
e Mobipocket,
facilitando a súa lectura tanto no ordenador como en distintos eReaders e
dispositivos móbiles.
Este novo e-book recolle as tendencias sociais, culturais e económicas que xera
a revolución impulsada pola Internet e os novos dispositivos electrónicos a
través de reportaxes (nas que aborda temas como a figura de Steve Jobs ou o uso
das redes sociais en España) e entrevistas a profesionais e empresarios do
sector TIC, contidos que ao tomar a forma de libro animan á súa lectura
repousada.
Xabier Sanmartín Cuevas
O xornalista
natural de Bilbao traballa no Grupo Correo Gallego dende 1993 e escribe na
sección de Tendencias do diario El Correo Gallego dende 2010, espazo no que
aborda en numerosas ocasións temas relativos ao sector TIC tanto galego como
global. Esta actividade compaxinouna con espazos en radio e televisión do mesmo
grupo, así como o blog Galicia Basket e algunhas colaboracións (durante o seu tempo de lecer) noutras publicacións culturais e dixitais.