Educación reforza a dimensión dinamizadora e dixitalizadora dos Clubs de Lectura
martes, 7 de setembro do 2021
A
Consellería de Cultura e Educación ampliou a convocatoria dunha das
ferramentas que máis contribúe a estender no ámbito docente o uso
das novas tecnoloxías da información: os Clubs de Lectura. A
ampliación materializouse coa inclusión da etapa de Primeira e
cunha duplicación do orzamento. En
total, serán 400.000 euros os que se destinen a este programa,
fronte aos 200.000 de 2020. O ano pasado chegou a 213 centros
escolares da nosa xeografía e a arredor de 10.100 participantes.
O
obxectivo é “estender os beneficios destes grupos aos máis novos,
no marco das bibliotecas escolares, logo dos éxitos acadados nos
clubs de lectura do ensino secundario, e reforzar, deste xeito, o
papel desta ferramenta na creación e consolidación de hábitos
lectores así como no desenvolvemento das competencias básicas do
alumnado (comunicación lingüística, competencia social, cultural,
artística...)”.
Segundo
explica a Consellería, os Clubs de Lectura son grupos de
dinamización que non se centran só en promover as vantaxes de ler
libros, senón que tamén impulsan competencias clave para a vida,
familiarizan aos escolares con espazos de convivencia e de educación
cidadá e, tamén, facilitan a súa incorporación á lectura dixital
co uso dos novos dispositivos de lectura. De feito, contribúen
claramente a integrar as Tecnoloxías da Información e a
Comunicación (as TIC) de forma natural nas súas actividades
(blogues, vídeos, booktrailers, redes sociais, presentacións etc.).
O
prazo de presentación de solicitudes estará aberto ata o vindeiro
15 de outubro. Poderán solicitar participar neste programa os
centros de Primaria, ESO, Bacharelato e ensinanzas de réxime
especial que inclúan un Club de Lectura na programación de
actividades da biblioteca escolar ou conten con profesorado que
pretenda poñelo en marcha con alumnado e outros membros da
comunidade escolar en tempos de lecer ou horario extraescolar.