Economía e o CSIC volven xuntar forzas a prol do coñecemento e a excelencia
venres, 31 de agosto do 2018
O
Centro
Superior de Investigacións Científicas (CSIC) e a Consellería de
Economía asinaron hoxe un acordo para impulsar a actividade dos
centros de coñecemento da primeira das entidades en Galicia. A
iniciativa conxunta, que se leva a cabo por quinto ano consecutivo
con feitura de contrato programa, busca levar os ditos centros cara
un escenario onde conten coa meirande capacidade de manobra para
achegar respostas concretas a desafíos sociais e económicos
concretos: os do noso tempo e lugar.
En
termos máis concretos, procúrase potenciar os proxectos de
investigación estratéxicos do CSIC, consolidar grupos de
referencia, emprazar a investigación realizada en Galicia a nivel
europeo e trasladar os resultados deste traballo á industria. O
contrato programa vén cun importe de 400.000 euros. Esta contía,
xunto coa doutros catro contratos programa, suman a cantidade de 2,5
millóns de euros.
O
acordo de hoxe foi formalizado polo conselleiro de Economía, Emprego
e Industria, Francisco Conde, e a presidenta do CSIC, Rosa Menéndez.
No acto participaron tamén a directora da Axencia Galega de
Innovación (GAIN), Patricia Argerey, o vicepresidente de
Organización do CSIC, Víctor Velasco, e o delegado institucional do
CSIC en Galicia, Eduardo Pardo de Guevara y Valdés.
A
axuda da Xunta diríxese aos cinco institutos de investigación do
CSIC na Comunidade: Misión Biolóxica de Galicia, Instituto de
Estudos Galegos, Instituto de Investigacións Mariñas, Instituto de
Investigacións Agrobiolóxicas de Galicia e Instituto de Ciencias do
Patrimonio, o INCIPIT, cuxa actividade ten xerado importantes
contribucións tecnolóxico-culturais, como
por exemplo as ferramentas CHARM e ConML, ou o portal
Fortalezas.es
para mostrar e reivindicar a riqueza patrimonial de ámbalas beiras
da raia galego-portuguesa, por poñer só dous exemplos.
Conde
incidiu no compromiso do Goberno galego cos centros de investigación,
“xa que en plena era tecnolóxica a I+D+i é o motor do cambio”,
explicou, engadindo que a contía de apoios anunciada hoxe diríxense
a mellorar a competitividade das devanditas infraestruturas e
favorecer a captación de talento, “apoios que suman 26,6 millóns
entre 2009 e 2017”.
Conde
finalizou agradecendo ao CSIC a súa implicación e apoio
institucional, así como a colaboración coa Axencia Galega de
Innovación (GAIN) que está a permitir “dotar de valor cualitativo
o Plan Galicia Innova”, así como dar resposta ás necesidades do
tecido produtivo en materia de transferencia de coñecemento.