EGANET recibe a 7 novos socios no que vai de ano

A Asociación de Empresas Galegas Adicadas á Internet e ás Novas Tecnoloxías (EGANET) continúa a sumar novas adhesións, e no que vai de ano acolleu a 7 novas firmas ata chegar aos 76 socios, o que serve para dar certa visibilidade das dimensións que está a tomar o sector TIC en Galicia, e das necesidades de colaborar entre empresas para prosperar.
Os novos asociados de EGANET durante o que vai de 2012 son Consultoría Informática del Noroeste, empresa marinense de desenvolvemento de software para o sector da carpintería de aluminio, PVC e similares; Streaming Galicia, empresa de Noalla (Sanxenxo) que permite difundir eventos en vídeo en vivo a través da Rede; Avansig, empresa coruñesa especializada en enxeñaría de software; Movendo Soluciones, proxecto emprendedor TIC con sede en Ames; Tecnología de la Información del Noroeste, empresa compostelá de consultoría e servizos TIC; Igneoma, laboratorio tecnolóxico radicado en Vilagarcía de Aurousa especializado na interacción humano-computador; e Cosaart, estudo de deseño teense especializado en páxinas web, imaxe corporativa e outros servizos semellantes.