EBE acollerá en Sevilla a máis de 3.000 representantes do eido blog
venres, 8 de novembro do 2013
Estes días chegounos
información dun evento TIC que os organizadores cualifican como “a
gran cita de Internet de fala hispanal”. Tanto por alcance dos temas a
falar como pola cantidade de xente que se prevé reunir: 3.000
profesionais da cousa dixital. Falamos de EBE, acrónimo de Evento
Blog España. O acontecemento en cuestión, que non é novo (vai
pola súa oitava edición), celébrase en Sevilla do 15 ao 17 de
novembro, achegando un programa centrado nas vantaxes a curto prazo
que xeran na sociedade os cambios e avances tecnolóxicos. Segundo
recordan os organizadores, retomando o fío de pór de relevo os
puntos fortes da xuntanza, esta foi a cita estatal que máis
movemento xerou durante os últimos meses en Twitter.
Celebrarase no Palacio de
Congresos e Exposicións de Sevilla (FIBES) baixo a lema Disrupción
Global. O obxectivo do evento é “incidir nas modificacións
xeradas nos ámbitos da sociedade, a empresa e a economía como
consecuencia do uso da tecnoloxía de Internet e doutras ferramentas
afíns”. Esta convocatoria foi especialmente aberto, de feito a
programación definiuse coa axuda dos asistentes: estes, a través da
web ou da canle de EBE en Twitter (@ebe), foron suxerindo que
contidos lles pareceron máis imprescindíbeis.
Os organizadores de EBE
salientan que ao longo de tódalas súas edicións, foi quen de
xuntar a máis 9.800 asistentes. Agardan que este ano se acaden os
3.000 participantes, “confirmando a tendencia de medre de público,
pasando de 700 inscritos en 2007 a máis de 2.100 en 2012”. Haberá
conferencias, encontros sobre cinema, proxeccións de audiovisual,
música e outras actividades de lecer e intercambio de coñecemento.
Confirmouse xa a participación de relatores como Gem Romeu
(Ogilvy&Mather) que ofrecerá un relatorio sobre branded
content; Vicky Bolaños (RTVE.es) que falará sobre
ciberactivismo e datos abertos; Céline Lazorthes (Leetchi.com) que
centrará a súa charla na economía colaborativa como modelo de
financiamento; Pedro Jareno (Minube.com) que aproximará aos
asistentes ao concepto de disrupción; e Xavier Forcadell
(Easypress.es) que abordará aspectos relacionados coa difusión de
contidos en liña, entre moitos outros. Víctor Manrique, pola súa
parte, amosará de forma práctica como a gamificación mellora
os resultados das estratexias de comunicación en redes sociais e
blogs.