Dúas webseries de raizame galega, polo miúdo este luns na Escola de Imaxe e Son de Vigo
venres, 14 de febreiro do 2014
- Un fotograma do primeiro capítulo de Canillejas
Seguimos a falar dun dos grandes fenómenos
tecnolóxico-audiovisuais da tempada, as webseries, un formato
que para moitos representa un vieiro firme para que as nosas
industriais culturais e creativas amplíen a súa actividade e sexan
quen de sobrevivir á que está caendo, que non é pouco. O caso é
que hai pouco falamos destas novas feituras que está a amosar o
audiovisuais, por unha banda con motivo do
certame convocado pola CRTVG e, pola outra, a raíz
da innovadora mostra-concurso que prepara o Concello de Carballo.
Pois ben, este luns 17 de febreiro falarase moito e ben sobre as
webseries. Será nun seminario organizado pola Escola
de Imaxe e Son de Vigo a partir das 13 horas.
O evento,
aberto ao público e a todo o alumnado do centro, xirará arredor das
novas oportunidades profesionais, laborais e de financiamento de
proxectos sobre este tipo de formato. O seminario estruturado en mesa
redonda (aberto integramente ás intervencións dos asistentes)
contará coa presenza de parte do equipo técnico das que están
consideradas polo CLAG como “dúas das webseries do ano
en Galicia”. Falamos de Clases de lo Social e Canillejas.
Para falar da primeira achega acudirá o director Pablo Cacheda e
para afondar nos obxectivos e no alcance da segunda das series
intervirá Pablo Fontela, coguionista e actor. Con este seminario, a
Escola de Imaxe e Son de Vigo quere “manter o seu compromiso de
calidade co seu alumnado achegando experiencias do sector ós
profesionais do futuro”, explica.
Canillejas,
informa o
Cluster Audiovisual Galego, “foi a primeira serie
española de época e unha das primeiras do mundo”. Emprazada no
século XIX, “os seus protagonistas analizan con humor mordaz e
irónico acontecementos históricos do século XX e da actualidade”.
Este compoñente retranqueiro da serie é sen dúbida unha das razóns
do seu éxito. Canillejas foi cualificada “como unha das
webseries máis salientábeis do ano 2013”. Pola súa banda, Clases
de lo Social é
unha comedia en pequenas pezas “que avalía con humor o noso
comportamento ante situación cotiás”. Contou coa participación
de actores galegos como Avelino González, Monti Castiñeiras, Carlos
Blanco ou Xulio Abonjo, entre outros. Asemade, conseguiu
financiamento para a súa segunda tempada “e converteuse nun
exemplo de produción dos proxectos audiovisuais da Rede”, engade o
CLAG.