Dispoñíbel a versión 4.5 da aplicación iCoyote para ter sempre localizado o noso coche
xoves, 12 de abril do 2012
Quen máis quen menos esqueceu algunha vez na súa vida o emprazamento exacto do
seu automóbil. Que as rúas se complican, que son todas semellantes, que se vai
pensando noutra cousa, en fin, que mesmo houbo quen
chamou á policía para denunciar un roubo, e logo resultou que o coche estaba
aparcadiño no seu sitio orixinal. Toda esta lea vén a conto porque no Apple
Store vimos de descubrir unha aplicación que ben podería valer para evitar que
o devandito aconteza. Trátase de iCoyote, unha ferramenta que vai pola
versión 4.5, e que inclúe unha función que fala por si soa: onde está o meu coche?
O recurso en cuestión vén da man de Coyote
Systems, empresa centrada en innovación arredor dos datos do tráfico en tempo
real, achegándoos na medida do posíbel a quen teña un teléfono de última xeración.
A ferramenta da que falamos, que é de balde, usa o GPS interna do smartphone, recoñecendo o estacionamento
do vehículo e informando en tempo real de tódalas incidencias que o usuario
poida atopar na estrada durante o seu traxecto, como por exemplo zonas de risco
e de perigo, aviso de radares fixos e móbiles e de treito, “amosándolle ao condutor o número de usuarios
da aplicación que estean máis próximos”. Isto é posíbel, informa a empresa,
grazas á extensa base de datos coa que se conta, achegada pola comunidade de
usuarios e o principal socio de Coyote, a RACC. E prosegue a empresa: “Grazas a esta versión 4.5, o condutor poderá
atopar de xeito doado o seu coche logo de telo aparcado e só con activar a
función checking na aplicación, a continuación do estacionamento, e reiniciando
iCoyote no modo mapa no intre en que se volva ao vehículo”.
Tamén se inclúe a función SOS, que nos informa
da nosa situación exacta con dirección e coordinadas, se fose preciso en caso
de accidente.