Dispáranse as descargas de TikTok

O pasado verán Bytedance Technology sorprendeu transformando a súa popular aplicación móbil musical.ly en TikTok, unha xogada un tanto arriscada que finalmente saíu ben, como demostra o elevado nivel de uso que está a conseguir esta aplicación entre o público mozo, cun incremento de descargar a nivel mundial do 20%, que nos EE.UU. chegou até o 25%. De feito, TikTok actualmente é unha aplicación máis descargada que Facebook, YouTube, Instagram e Snapchat, sumando uns 130 millóns de usuarios e sen parar de medrar.
Esta ferramenta permite crear vídeos de 15 segundos, principalmente musicais, que buscan así manter a demanda de contidos de consumo rápido como no seu día facían Vine, Instagram e a propia musical.ly, confirmando que continúa a haber un grande mercado para estes formatos breves.
Entre as claves do éxito de TikTok está a posibilidade de publicar reaccións ao carón do clip de vídeo orixinal, facendo que esta plataforma gañe moita popularidade ultimamente, recuperando unha tracción que parecía ter perdido.