Deteñen a unha moza por facerse pasar por unha antiga amiga no Tuenti
mércores, 8 de abril do 2009
Dende logo, isto das redes sociais que tan de moda se
puxeron nos últimos tempos, nunca deixan de sorprendernos; cando non son
usuarios que collen nomes doutra xente sen o seu permiso, son internautas que
colgan fotografías con copyright ou “amigos”
que graban vídeos doutros “amigos” e
os publican dando lugar a innumerables conflitos coa lei.
Desta volta, uns axentes do Corpo Nacional de Policía veñen
de deter en Valladolid a unha xove de 20 anos como suposta autora dunha
suplantación da identidade doutra moza na rede social Tuenti.
A moza accedeu a esta web e creou unha identidade co nome e
a fotografía dunha antiga amiga súa. Unha vez creado o perfil, comezou a
insertar na rede contidos “inxuriosos”
contra amizades da vítima, que en canto se enterou, denunciou os feitos nunha
comisaría.
Unha vez posta a denuncia, o Grupo de Innovacións
Tecnolóxicas da Policía iniciou a investigación e descubriu que a “suposta autora” da suplantación da
identidade tiña a intención de “desprestixiar
e orixinar enemizades a través da Rede cos amigos da denunciante”; algo que
a esta última lle produxo “graves
problemas psicolóxicos”.
Se este tipo de aplicacións en Internet son unha arma de
dobre fío para os adultos, qué non farán nas mans dun menor? É por isto que as
autoridades recomendan que se vixíe o que os menores fan na Rede e se limite o
acceso a determinados contidos perxudiciais para a súa integridade física e
moral.
O Blog21 publicou, o pasado 29 de marzo, unha entrada sobre
seguridade en redes sociais, de moita utilidade tanto para os usuarios
deste tipo de aplicacións como para os pais e nais de internautas menores.