Deseucaliptización, a palabra galega do ano elixida polos internautas
xoves, 27 de decembro do 2018
Finalmente
os internautas elixiron cos seus votos en liña a Palabra
galega do Ano 2018. Trátase dun termo que vén moi a conto sobre
as arelas da sociedade do país respecto do medio natural e dos
coidados que require, poñendo de manifesto como lles gustaría aos
galegos e ás galegas que fosen eses coidados: moito máis centrados
en reivindicar o propio, o sustentábel e o ecolóxico. O termo
elixido, por ampla maioría, foi “deseucaliptización”.
Segundo
informa a Real Academia Galega, impulsora do proceso de selección
xunto coa Fundación Barrié, o termo, se ben non está recollido no
Dicionario da Lingua Galega, “reflicte un aspecto destacado da
crecente preocupación pola xestión dos nosos montes e axústase ás
regras de formación de palabras da nosa lingua”.
“Deseucaliptización”
sumou 3.114 votos, máis da metade dos 5.724 votos emitidos, moi por
diante das outras cinco palabras finalistas, todas elas “cunha
importante carga informativa relacionada con acontecementos que
marcaron a actualidade dos últimos doce meses”, sinalou a RAG, que
salienta que a segunda máis votada fose “feminismo”, con máis
dun milleiro de votos nun ano cheo de reivindicacións en todo o
mundo. Este compromiso coa igualdade tamén se reflectiu na boa
cantidade de votos que recibiron “sororidade” e máis
“apoderamento”, o primeiro termo con 650 votos e o segundo con
máis de 300.
Volvendo
á voz gañadora, a RAG pon de manifesto a gran cantidade de cousas
que pon de manifesto o feito de ter sido elixida. Para comezar,
“fala” do desexo de recuperación da masa forestal autóctona
cando a plantación e reforestación indiscriminada dos eucaliptos
provoca cada vez máis rexeitamento, tanto pola pegada que deixan na
paisaxe como polo seu impacto na biodiversidade e outros problemas
asociados á súa proliferación, e non só en Galicia e no veciño
Portugal, senón tamén noutros lugares do planeta como California.
A
asociación Verdegaia, como lembraremos, foi unha das grandes
impulsoras do termo gañador deste ano, sobre todo a raíz de que na
primavera pasada comezaran a traballar en Lousame as Brigadas
Deseucaliptizadoras cunha primeira intervención na Área
Conservada pola Comunidade de Froxán, unha fronte activista
constituída xa por máis de 350 persoas que “partillan a
responsabilidade das titulares de máis de 500 hectáreas de
territorio unidas pola vontade común de liberar o territorio das
especies exóticas invasoras responsábeis da degradación da
biodiversidade e das catástrofes causadas polos lumes ano tras ano.”