Descende un punto o pirateo de software en España
martes, 12 de maio do 2009
Business Software Alliance
(BSA), a compañía que hai dous anos ofrecía ata un millón de dólares a todo
aquel que denunciase o emprego de software pirata na súa empresa en EEUU, vén
de facer públicos os resultados do seu VI Informe Global
sobre Piratería de Software en 2008 que lle encargara á consultora IDC, e
para sorpresa de todos, “o índice de
piratería en España disminuíu un punto” (e iso que aquí non ofrecían a
frioleira que daban do outro lado do charco), situándose agora nun 42 por
cento.
Pese a que esta cifra
segue a ser moi elevada e o noso país segue estando por enriba da media dos
países do noso entorno en pirateo de software, vimos de lograr un mínimo
histórico neste tipo de actividades delictivas, que se mantiñan en ascenso
dende hai moitos anos atrás.
Con todo, o 42 por cento rexistrado
en España indica que aínda falsificamos un de case cada dous produtos de
software, unha cantidade que provoca perdas económicas de máis de 700 millóns
de euros anuais.
Para loitar contra esta
práctica, que segundo BSA “non só é
delito senón que tamén pon en perigo os datos das empresas e os equipos
informáticos das mesmas”, a devandita entidade realiza cada ano un
seguimento sobre a piratería que se fai no mundo e segundo os datos extraídos
do estudo de IDC deste ano, en liña co crecemento do sector tecnolóxico en
xeral, e do mercado de software para PCs en particular, as perdas polo uso ilegal
de software tamén medraron ata acadar os 739 millóns de euros. Isto supón un
aumento dun 14 por cento aproximadamente, frente ás perdas de 648 millóns de
euros rexistradas en 2007.
Como apuntamos
anteriormente, España segue a estar por enriba da media dos países do noso
entorno, e en concreto, o noso índice de piratería sitúase sete puntos por
enriba da media da UE, recortando un punto con respecto ao ano pasado; no que
respecta á media mundial, dado que ésta subiu do 38 ao 41 por cento en 2008,
España situaríase por primeira vez só un punto por enriba, cando hai dous anos
estaba ata 11 puntos por enriba.