Decálogo para que os autónomos usen software libre
martes, 29 de marzo do 2011
A mediados deste mes de marzo tivo
lugar en Zaragoza o Primeiro Congreso
Nacional de Software Libre no Traballo Autónomo, que se celebraba con
vistas a achegarlle as vantaxes das ferramentas tecnolóxicas abertas aos
profesionais autónomos de todo o Estado, para a mellora, entre outras cousas, da
súa xestión empresarial e tamén, xa de paso, do seu peto.
Froito dos traballos desenvolvidos
neste primeiro congreso, os profesionais do sector elaboraron un decálogo que
mostra as principais razóns polas que os autónomos deberían optar polas
tecnoloxías libres, que se pode descargar
totalmente de balde na web de CENATIC.
Como adianto a este documento, Sebastián
Reyna, presidente de UPTA, afirmou que “o
uso do software libre aporta no día a día do autónomo unha meirande
produtividade e competitividade, mellores rendementos nos seus procesos de
tratamento da información, non só no seu funcionamento interno ou con outras
empresas, senón tamén na súa relación coa administración”.
Tampouco faltou ao evento o director
xerente de CENATIC, Miguel Jaque, quen na súa intervención resaltou as vantaxes
que o software libre xera en canto a produtividade e eficiencia tecnolóxica.
Jaque asegurou que “o que o software
libre lle ofrece aos autónomos é unha tecnoloxía de calidade constrastada e
garantizada pola satisfacción dos seus usuarios, que acada o 80 por cento”.
O decálogo elaborado por CENATIC
achega as dez principais razóns para que os autónomos usen software libre,
entre as que destacan, non só o aforro económico en materia de licenzas e a súa
renovación, senón tamén o feito de que son tecnoloxías máis accesibles, de máis
calidade e máis completas, conservando a súa independencia tecnolóxica.