DIGAMEL equipa o seu persoal de almacén e transporte con pulseiras de actividade
venres, 12 de febreiro do 2016
O grupo galego DIGAMEL,
especializado na distribución de material eléctrico por toda a nosa
xeografía, vén de informar dun recoñecemento ao seu labor que
contribúe ao prestixio da propia empresa e, tamén, á integración
no día a día dos traballadores as máis avanzadas tecnoloxías. O
recoñecemento, máis polo miúdo, vén da man da
multinacional ABB, que premiou o labor loxístico e comercial do
persoal de DIGAMEL con pulseiras de actividade. Estes trebellos
tecnolóxicos (smartwatchs de adestramento) estanse a integrar
para optimizar o labor do persoal do almacén e de transporte.
Juan Luis Trueba, en
representación do grupo ABB, fixo entrega destes wearables
(carrexábeis) con capacidade
para facer seguimento das actividades desenvolvidas e con conexión
Bluethooth para a integración de dispositivos intelixentes. As
delegacións que DIGAMEL ten na Coruña, Lugo, Ourense, Pontevedra,
Santiago, Vigo e Vilagarcía serán, en palabras dos responsábeis do
grupo, “pioneiras en incorporar este dispositivo entre os seus
empregados”, co que poderán medir as súas marcas de actividade e
recibir correos a través destes weareables. Respecto das
características concretas destes, sinalar que son dispositivos
Leotec
modelo Fitness Touch, pulseiras de actividade desenvolvidas e
deseñadas en España que inclúen, entre outras cousas, pantalla
táctil, display OLED, batería dunha semana de duración,
Bluetooth e tecnoloxía compatíbel con Android e iOS. Son
resistentes á auga e mergullábeis. Entre outras cousas incorporan a
funcionalidade “fitness + sincronización”, a identificación de
chamadas con dispositivos intelixentes e o aviso de chats e mensaxes
vía SMS ou WhatsApp.