Culturgal leva tecnoloxía de última xeración a Pontevedra
luns, 22 de novembro do 2010
A Asociación
Culturgal, creada en xullo deste ano polas máis importantes asociacións
profesionais da industria cultural galega, vai afrontar a organización da III
edición da Feira das Industrias Culturais, que terá lugar do 26 ao 28 de
novembro en Pontevedra.
Este encontro, no que a tecnoloxía será o
prato estrela, contará entre outras moitas cousas con videoxogos nos que o
control se basea na emisión de ondas cerebrais, pantallas en 3D e
multitáctiles, láser graffiti, intelixencia artificial...que virán ata a cidade
do Lérez da man de Eganet.
A asociación de empresas galegas adicadas
a internet ofrecerá unha completa mostra dos últimos avances mundiais no eido
da tecnoloxía aplicada á cultura, ofrecéndolle ao público asistente a
posibilidade de interactuar coas ferramentas máis novidosas e sorprendentes.
Entre todas as actividades e obradoiros
dispoñibles, nos que a xente poderá comprobar de primeira man o inquedante
mundo das novas tecnoloxías, destaca o Game Over, un obradoiro no que a empresa
galega Ceo Aberto lle achegará á sociedade galega as últimas novidades en
materia de videoxogos, ferramentas web e aplicacións informáticas.
Desenvolverase o vindeiro sábado ás 17h e
ás 20h e o domingo ás 11h e ás 14h, e nel, rapaces e rapazas de 10 a 16 anos poderán achegarse
á historia do hardware e do software a través dos videoxogos.
Asemade, entre outras novidades, poderán
probar dous dos últimos xogos desenvolvidos por Neurosky, unha empresa que
deseña dispositivos de control baseados na emisión de ondas cerebrais. O xogo Jedi Trainer, no que o xogador debe
controlar coa mente os movementos dunha bóla, e o casco Neurosky Headset, que permite manexar unha personaxe en función da
concentración e a meditación do xogador. Iso sin contar que, mediante un
proxector compatible con 3D e unhas gafas nVidia, as persoas que se acheguen
ata o stand de Eganet poderán probar
a sensación de xogo tridimensional, grazas a unha pantalla de 42 pulgadas que conta
coa última tecnoloxía 3D na que se proxectarán vídeos que se visualizarán coas
gafas 3D, tamén de última xeración.
Outra das actividades estrela será o Láser Graffiti, que consistirá na
videoproxección de Graffiti dixital sobre o Pazo da Cultura. Para facelo,
usarán un sistema informático formado por unha cámara astronómica, un proxector
de vídeo, un punteiro e un portátil, equipado cunha versión mellorada e
adaptada do software desenvolvido e liberado por un colectivo estadounidense.
Segundo informan dende a organización, “levarase
a cabo un obradoiro previo no que os asistentes poderán descargar o software e
aprender os rudimentos do seu uso”. Asemade, “as persoas interesadas que se acheguen co sue propio portátil e unha
webcam sairán convertidas en graffiteiras dixitais”, aseguran os
organizadores.
Finalmente, o público que asista a
Culturgal tamén poderá comprobar de primeira man o fucionamento dunha pantalla
multitáctil de grandes dimensións e alta sensibilidade, baseada nun sistema de
iluminación interior por infravermellos. O avance deste dispositivo con
respecto ás pantallas táctiles é que permite que varias persoas participen de
forma simultánea. Nos videoxogos, por exemplo, os xogadores poden competir ao
tempo e recibir a información da
clasificación en tempo real, o que dispara a emoción do xogo.
Os colectivos membros, entre os que se
inclúen a Asociación Galega de Editores (AGE), a Asociación Galega de Empresas
de Artes Escénicas (Escena Galega), a Asociación Galega de Empresas Musicais
(AGEM), a Asociación Galega de Produtoras Fonográficas (Agaphono), a asociación
de Empresas Galegas Adicadas a Internet e ás Novas Tecnoloxías (Eganet) e a
Asociación Galega de Produtoras Independentes (Agapi), asumen a organización do
evento “para darlle viabilidade ao
proxecto, cunha folla de ruta trazada activamente polo sector e co obxectivo
prioritario de visibilizar a oferta cultural do país”.