Cuatro permitirá ver os últimos episodios de Perdidos na súa web

Durante a noite do martes estreouse nos EE.UU. a nova e derradeira tempada de Perdidos, serie de televisión que este ano vai supor toda unha revolución audiovisual, de xeito que ao día seguinte da súa emisión norteamericana poderá seguirse en versión orixinal subtitulada a través de Digital+ e xusto unha semana despois, en aberto en Cuatro (e cuns ridículos 45 minutos de vantaxe na Fox), apurándose as datas de emisión dun xeito sen precedentes, e que podería sentar cátedra, para evitar as descargas das series da Internet e poder facer unha explotación internacional simultánea das mesmas.
Pero a xente de Cuatro vai moito máis aló, e está a organizar o que chaman Experiencia Perdidos, con programas especiais dedicados ao fenómeno da serie e incluso ofrecendo os capítulos de estrea de balde mediante streaming na web de Cuatro xusto despois da súa emisión televisiva, práctica sen precedentes na canle de Prisa.
Deste xeito, os seguidores da serie que perdan un episodio por televisión poderán pórse ao día a través do servizo Play Cuatro, non tendo que percorrer ás descargas web para satisfacer tal demanda, o que parece unha intelixente estratexia, que permite manter o control da audiencia, á que se achegan os seus contidos favoritos por plataformas legais e explotadas comercialmente, para que non teñan que facer uso de alternativas menos ortodoxas.
Cuatro tamén fará uso de redes sociais para tirar proveito do éxito de Perdidos, baseado en boa medida na Internet, e dentro da Experiencia Perdidos realizarán unha serie de accións multimedia para que os seareiros da serie poidan dar renda solta á súa imaxinación e contribuír a este fenómeno sen precedentes no panorama televisivo.