Cuarta Porta pon a infografía en 3D ao alcance da man de autónomos e PEME
mércores, 8 de xuño do 2016
Sen dúbida un dos futuros da mercadotecnia pasa
pola infografía en 3D, unha tecnoloxía que posibilita a
materialización de imaxes e animacións cunha calidade moi próxima
á realidade da nosa contorna, mesmo indo alén dela. A infografía
en 3D, que se pode aplicar para dar forma a calquera produto ou
proxecto que teñamos en mente antes de que ese produto ou proxecto
(arquitectura, enxeñaría, urbanismo, deseño industrial,
xardinería, etc) sexa unha realidade palpábel, é un dos piares
fundamentais da firma compostelá Cuarta
Porta, que dun tempo a esta parte abriu interesantes camiños
para
que ideas de todo tipo (edificios, interiores, proxectos de
urbanismo, produtos de mercado) poidan dar coa mellor das
materializacións posíbeis. E tamén, coa mellor carreira
comercial posíbel.
En palabras dos impulsores de Cuarta Porta, Víctor
Vigo e Pablo Ces, “é o mellor método para amosar a un cliente un
edificio que non está construído aínda, ou poder facer imaxes de
construcións xa existentes, dende ángulos imposíbeis na
realidade”. Un dos obxectivos desta firma compostelá, cuxos
fundadores proveñen do ámbito audiovisual, é que as tecnoloxías
de infografía en 3D estean ao alcance da man de todos os autónomos
e empresas, por pequenas que estas sexan, esa é unha das razóns de
ter fornecido unha ampla variedade de custes sobre proxectos,
dependendo de cal sexa a envergadura do mesmo e da complexidade do
modelo a achegar, etc.
En Cuarta Porta, ademais de cos devanditos clientes,
traballan tamén dando forma a intervencións exteriores,
industriais, oficinas ou despachos, sendo algúns dos principais
usuarios dos seus servizos empresas de arquitectura, interiorismo ou
decoración. Entre os principais clientes da firma compostelá
atópanse empresas como por exemplo HRG, Augas Mondariz, Blusens,
Cándido Hermida ou Augas Mestas. Tamén desenvolven importantes
proxectos para concellos da nosa terra.