Cruz Vermella e R capacitaron dixitalmente a máis de 200 persoas maiores en Galicia
mércores, 21 de setembro do 2022
A
organización Cruz Vermella e a operadora R fixeron balance da súa
actividade conxunta a prol da alfabetización dixital das persoas
maiores, materializada a través do programa itinerante Enredando
Tour R, desenvolvido no verán. Segundo fixeron saber, promoveron
a capacitación tecnolóxica de máis de 200 persoas en Galicia,
entre o 20 e o 29 de xullo. A xira percorreu 6 localidades das
provincias de Lugo e Pontevedra, coa participación directa da
operadora galega R e a colaboración da Consellería de Política
Social da Xunta de Galicia.
O
78,5% das persoas participantes nos obradoiros foron mulleres e a
media de idade, de 75 anos. Dos asistentes ás formacións, un 41,7%
manifestaron que o seu coñecemento dixital previo era baixo.
“Grazas
a estes talleres, impartidos nunha contorna lúdica e agradábel por
persoal especializado e voluntariado, logrouse que os maiores lle
perdesen un pouco o medo ás novas tecnoloxías e que desenvolvan
habilidades básicas para manexalas, aprender e avanzar”, sinalaron
as dúas entidades, engadindo que en cada unha das 6 localidades
(Lugo, Chantada e A Fonsagrada, na provincia de Lugo e Vigo, e
Pontevedra e A Estrada, na de Pontevedra) instalouse a aula móbil de
Cruz Vermella e R, cuxa finalidade era “enredar’ aos maiores no
mundo dixital”; e para iso podían escoller, segundo os seus gustos
e intereses, entre diferentes dispositivos: smartphone,
tableta ou portátil. A actividade dirixiuse a persoas de 60 ou máis
anos e a media de idade dos participantes foi de 73,5. Ao seu abeiro
propuxéronse 4 menús/talleres para elixir, dedicados a abordar
aplicacións e temáticas diferentes: navegar por Internet; utilizar
o WhatsApp para comunicarse; facer xestións cotiás a través de
Internet, co SERGAS, banca electrónica, compras online ou ben
instalar/desinstalar aplicacións móbiles e coñecer Youtube Kids.
Os contidos expostos tiveron moi boa aceptación e o 49,5% das
persoas consideraron a formación de moita utilidade para a súa día
a día.
En
total, durante o Enredando Tour R de 2022
desenvolvéronse 18 horas de capacitación en competencias dixitais
básicas e 397 obradoiros baseados nos menús formativos propostos.
Nesta
segunda edición os menús enfocáronse a contidos dixitais no móbil
e relacionados coa seguridade nas aplicacións e no seu manexo para
apoderar ás persoas maiores, adaptándose todo o posíbel ás
necesidades de cada asistente, ao seu nivel de coñecemento
tecnolóxico e aos seus intereses dixitais.