Convocado dende a USC un concurso de curtas sobre as potencialidades de medre territorial das enxeñarías
luns, 22 de abril do 2013
A
Universidade de Santiago de Compostela vén
de convocar
un
concurso de curtametraxes
co móbil cun tema a tratar
como nexo común e requisito fundamental a ter en conta polos autores
das pezas a presentar: as
posíbeis
achegas da enxeñaría para o desenvolvemento do territorio galego. O
obxectivo deste certame é
coñecer e difundir as inquietudes dos futuros universitarios sobre
esta temática e descubrir o quefacer dos enxeñeiros
no ámbito do desenvolvemento rural, especialmente nos sectores
forestal e agrogandeiro.
Este concurso de curtas
con teléfono móbil, que se acompaña do epígrafe Coñeces as
posibilidades da enxeñaría para o desenvolvemento do territorio
galego?, diríxese ao colectivo estudantil preuniversitario que
no presente curso 2012-2013 estea matriculado en 2º de bacharelato
ou en calquera ciclo formativo de grao superior en calquera centro do
territorio nacional. A divulgación e a sensibilización sobre este
abano de titulacións de ensino superior ligadas ao territorio e ao
desenvolvemento do medio natural, así como outras titulacións
ligadas á enxeñaría civil, constitúen outro dos obxectivos que
busca a Universidade de Santiago coa convocatoria deste concurso de
curtas con móbil. As bases do certame, por certo, xa están
dispoñíbeis na web de
seu.
O prazo de presentación
das pezas rematará o vindeiro 27 de maio de 2013 e os seus autores
deberán facer entrega das súas respectivas propostas creativas en
calquera dos rexistros xerais da Universidade de Santiago, así como
nas demais fórmulas que recolle a normativa vixente. Os traballos
presentados, ben nun DVD ou nunha memoria USB e cunha duración de
entre 30 e 90 segundos, deben ser gravacións de vídeos, en ningún
caso montaxes de fotografías, e teñen que estar realizados en
formato .avi, .mov ou .mp4. O gañador do concurso poderá
matricularse gratis o próximo exercicio académico 2013-2014 no
primeiro curso de calquera das titulacións de grao ofertadas pola
Universidade de Santiago nos seus Campus de Lugo e de Compostela. Os
outros catro galardoes establecidos nas bases do concurso consisten
na exención do pago do importe da matrícula nun curso de idiomas no
Centro de Linguas Modernas (CLM) da Universidade de Santiago de
Compostela. O xurado, que será nomeado polo reitor da USC, Juan
Casares, e valorará a orixinalidade das propostas e a consecución
dos obxectivos formulados nas bases da convocatoria, fará público o
seu fallo a finais de xuño. A entrega dos premios terá lugar no mes
de xullo no transcurso dun acto que se celebrará en Lugo.
Segundo informa a
Universidade de Santiago, a temática sobre a que versa este certame
garda estreita relación coa oferta de titulacións da Escola
Politécnica Superior de Lugo, na que se imparten os graos en
Enxeñaría Forestal e do Medio Natural, Enxeñaría Agrícola e do
Medio Rural, Enxeñaría Civil, Enxeñaría das Industrias
Agroalimentarias e Enxeñaría en Xeomática e Topografía. “Este
abano de graos”, engade a USC, “xunto cos
másteres universitarios en Enxeñaría Agronómica, Arquitectura da
Paisaxe, Dirección de Proxectos, Enxeñaría de Montes, Xestión
Sustentable da Terra e do Territorio, tamén impartidos na Escola
Politécnica Superior do Campus de Lugo, configuran
unha oferta de ensino superior de gran atractivo para todos aqueles
que desexen contribuír profesionalmente ao desenvolvemento rural”.
Por certo que o número de estudantes matriculados este curso
2012-2013 no centro universitario campus de Lugo ascende a 1.437
estudantes.