Converxencia XXI maniféstase a prol dunha Rede sen lei Sinde
luns, 27 de decembro do 2010
O rexeitamento da lei Sinde segue a dar que falar. Cómpre dicir que a día de hoxe,
rexeitar a lei Sinde non significa
desbotar calquera xeito de protexer os dereitos das e dos artistas, senón
rexeitar o peche de páxinas web que dean acubillo a servizos para o intercambio
libre de ficheiros na Rede. Dende a nosa terra, unha das voces que máis se fixo
escoitar os días pasados foi a do BNG, pero tamén a de outro partido galego: Converxencia XXI. Para esta fronte
política, o feito de que desbotase no Congreso dos Deputados a lei Sinde (disposición final segunda de
Lei de Economía Sustentábel) só pode ser considerado como “unha boa nova”. Para Converxencia XXI, a decisión de pechar páxinas
por violación dos dereitos de propiedade intelectual, un dos piares sobre os
que se apoiaba o dito proxecto de regulamento rexeitado, é algo que corresponde
á xustiza, e non a unha comisión do Ministerio de Cultura.
A plataforma galega pídelles así ao Goberno e
aos demais partidos que, nos posteriores debates da lei no Senado e no Congreso,
“non se recupere este preocupante e
ineficaz parágrafo, que non vai reducir a piratería e que pola contra porá en
risco liberdades fundamentais da cidadanía”.
Para Converxencia XXI, e así o dá a coñecer
nun comunicado, cómpre protexer os bens da Rede, non limitalos ou loitar contra
eles. Estes bens son sobre todo as posibilidades que achega en materia de
intercambio de contidos e información, eido xenérico que non pode ser atacado
por mor dunha parte: as descargas sen autorización. “Internet é un garante fundamental da liberdade e da cultura”,
sinala Converxencia, “e tamén unha panca
no desenvolvemento económico e na saída da crise”.
A continuación, damos conta das propostas da
plataforma para acadar unha Rede que satisfaga a todas e todos, propostas que
podemos ver en máis detalle no
Facebook.
· Apostar por unha neutralidade total da
Rede, “para evitar as restricións á
liberdade que poden querer aplicar os provedores de servizo e os gobernos”.
· Declarar Internet como servizo básico fundamental.
· Esixir a cobertura de internet de banda
larga en todo o territorio e para toda a poboación, para que todos os
cidadáns estean en iguais condicións de competir.
· Reformar en profundidade da lei de
propiedade intelectual de xeito que se protexa a transmisión, o uso non
comercial e a creatividade cultural.
· Reformar
e ampliar a lei de transparencia para que se publiquen en internet
todos os datos producidos pola administración.
· Promover contidos sen copyright por parte das
administracións, apostando polas licenzas libres, en especial en toda a
produción da administración (mapas, bancos de imaxes, informes, libros...) e no
sistema educativo.
· Impulsar un novo modelo de I+D+i baseado
na retirada de obstáculos á creatividade e no estímulo fiscal á produción de
ideas, e non na subvención.