Contact desenvolve o concurso galego de fomento da lectura E ti que vés lendo?
martes, 8 de setembro do 2015
A empresa galega Contact
Comunicación, responsábeis de innovacións tan salientábeis
como Orama (sistema de balde
para a promoción de actividades socioculturais), vén de desenvolver
para a Federación de Librarías de Galicia un concurso destinado a
impulsar o comercio intelixente no eido editorial da nosa terra. O
certame chámase E ti que vés lendo? e insírese dentro do
programa de axudas da Dirección Xeral de Comercio para impulsar en
Galicia a práctica do Smart Commerce. Para participarmos na
actividade, só teremos que compartir unha recomendación literaria a
través da web da devandita federación. De contado, entraremos
no sorteo dun vale desconto por valor de 20 euros.
Ademais, con cada
recomendación, recibiremos un cupón que poderemos trocar por un
agasallo sorpresa en calquera das librarías participantes. Para
atopar a máis próxima, teremos que acceder a un mapa onde se
xeoposicionan todos os establecementos integrados na federación. O
que se pretende con esta iniciativa é “fomentar á lectura ó
tempo que dinamizar as vendas nas librarías galegas”.
Os usuarios, sinalan
dende Contact, poden participar tanto dende o seu computador de
sobremesa como desde calquera tableta ou dispositivo intelixente, xa
que a páxina está 100% optimizada para trebellos móbiles.