Consumo achega unha charla para amosar á cidadanía como mercar ao xeito na Rede
xoves, 5 de xaneiro do 2017
As
aulas CeMIT de Abegondo,
Beariz,
Valga e
Vilagarcía de
Arousa (Centro Matosinhos) van acoller unha xornada simultánea
dirixida a informar polo miúdo aos consumidores sobre as vantaxes e
riscos de mercar a través de Internet. A charla, organizada polos
catro Concellos e o Instituto Galego de Consumo, celebrarase o
vindeiro luns 9 de xaneiro, a partir das 11 da mañá. A
actividade, aberta a toda a cidadanía, insírese no ciclo Consumo na
Rede. Segundo informan os organizadores, a
sesión vén moi a conto neste intre concreto no que vivimos, dado
que coincide co inicio da tempada de rebaixas, unha tempada que tamén
abrangue ao comercio electrónico.
Por
outra banda, engaden, tampouco hai que esquecer que o propio ámbito
do ecommerce é un ámbito
que medra a día de hoxe de xeito exponencial, haxa rebaixas ou non,
“de aí a necesidade de lograr que os usuarios coñezan as vantaxes
que fornece, pero tamén os riscos que supón”, explican fontes dos
concellos e do IGC. Na sesión
tamén se informará sobre os dereitos que asisten á persoa
que realiza unha compra a través das novas tecnoloxías a hora de
realizar devolucións ou cambios. Igualmente forneceranse consellos e
recomendacións para un uso responsábel das ferramentas e servizos
de ecommerce.
A charla terá unha duración de hora ou
hora e media e realizarase a través do sistema de vídeo conferencia
desde a Escola Galega de Consumo. Está orientadas a todos os
públicos ao tratar temas actuais que nos afectan en gran medida como
consumidores habituais.
As persoas interesadas en seguir o
evento a través de vídeo conferencia que se emitirá nas devanditas
aulas CeMIT (e tamén nas aulas que se adhiran á iniciativa ao longo
destes días), poderanse inscribir a través da plataforma XEA -no
caso de ser usuario rexistrado das aulas CeMIT-, ou de maneira
presencial nas propias aulas informáticas.
Na
sesión, a respecto dos contidos, traballaranse todos os aspectos
relacionados con consumo cando accedemos á Rede por distintos
medios: computadores, redes sociais ou telefonía móbil.