Compostela converterase en outubro na capital nacional do software libre
venres, 25 de maio do 2012
A Asociación de empresas galegas de software libre, AGASOL, que vén de
afianzar os piares que terman das fontes abertas no noso país ao ter asinado un
convenio de colaboración con CENATIC, co que mellorar a liberación do software no
noso territorio, vén de facer unha nova e valiosa achega para esta tecnoloxía
en Galicia, ao asumir a organización do evento máis importante sobre software
libre que se celebrará este ano en España: a Libre Software
World Conference 2012 -LSWC-.
AGASOL contará en todo momento co apoio de outra grande da materia a nivel
nacional: Asolif, a Federación Nacional de Empresas de Software libre, de quen
é socio fundador e con quen está a pechar os detalles do programa completo da
LSWC.
O que se consegue coa organización deste evento é, en palabras dos seus
responsables, “converter dous días de
encontro nunha importante ferramenta de divulgación de novidades, intercambio
de coñecemento e proxectos de futuro en torno ao software libre”.
Sabemos (polo que indican na súa web) que o último precedente dun evento
destas características foi a LSWC 2011, celebrada con éxito de asistencia en
Zaragoza, e que AGASOL asume agora a tarefa de traer á capital galega “o foco de atención de empresarios e
profesionais do software libre e dos seus ámbitos de actuación durante
dous días de traballo”: o 18 e 19 de outubro.
O evento, que seguindo a filosofía que caracteriza ao software libre non
podía deixar de ser de entrada libre, público e aberto á participación de
tódalas persoas interesadas na materia, celebrarase na Cidade da Cultura de
Galicia, e, en palabras do presidente de AGASOL, Alejandro Escobar, “será unha oportunidade para dar a coñecer a
boa saúde do software libre en Galicia, buscar pontes para futuras
colaboracións a nivel internacional, e facilitar un espazo para compartir
coñecemento no que participen expertos, empresarios, institucións e a propia
cidadanía”.