Comeza en TikTok a campaña anti-machista da Delegación do Goberno en colaboración coa mocidade galega
luns, 21 de novembro do 2022
Este
domingo
a Delegación do Goberno en Galicia lanzou na rede social TikTok, en
colaboración coa creadora galega Ireniusx, unha campaña de
sensibilización contra a violencia machista quen pon o foco na
mocidade. O delegado José Minoñes lanzou un chamamento á xuventude
da nosa terra a participar na actividade: “Necesitamos a vosa axuda
e contamos convosco para construír unha sociedade máis
igualitaria”, reivindicou José Miñones, coincidindo coa
publicación no perfil de Ireniusx en TikTok (este domingo) dun vídeo
no que mostra a ilustración que creou a partir dos trazos que
debuxaron o pasado luns Ada e Leo, unha alumna e un alumno do IES
Fernando Wirtz da Coruña, durante o acto de presentación da
iniciativa.
Unha
vez publicado o vídeo, os usuarios de TikTok foron convidados a
subir os seus propios vídeos contra a violencia de xénero coa
etiqueta #25NGalicia e as mencións @ireniusx e @delgobgalicia, nos
días próximos ao 25 de novembro, Día Internacional da Eliminación
da Violencia contra as Mulleres.
O
delegado animou ás mozas e mozos de 13 anos en diante a expresarse
libremente a través TikTok, de forma individual ou en grupo,
seguindo a proposta da Delegación do Goberno, “xa sexa con
palabras, cantando, bailando ou como prefiran, para dicir: non á
violencia de xénero”.
A
Delegación pon en marcha por primeira vez esta iniciativa en TikTok
contando coa galega Ireniusx, que ten 6,6 millóns de seguidores na
rede social.
Esta
acción en redes sociais está impulsada pola Delegación do Goberno
en Galicia e forma parte da programación Meninas 2022, que
inclúe unha vintena de actos en torno ao Día Internacional da
Eliminación da Violencia contra a Muller. A Delegación remitiu
material gráfico e información a todos os Institutos de Educación
Secundaria (IES) de Galicia para convidar o seu alumnado a sumarse.
José
Miñones lembrou que “4.200 mulleres en Galicia contan actualmente
con seguimento e protección de Policía ou Garda Civil por risco de
sufrir violencia de xénero e que 66 foron asasinadas en Galicia
desde 2003, cando se empezaron a rexistrar os crimes machistas”. E
engadiu: “A violencia machista é unha realidade cruel e inxusta
que se ceba co 50% da poboación e que non ten cabida na nosa
sociedade”.
Programación
Meninas 2022
A
Delegación do Goberno en Galicia e as subdelegacións provinciais
celebran durante estas semanas xornadas, exposicións, certames e
outros eventos de sensibilización con motivo do Día Internacional
da Eliminación da Violencia contra a Muller. En total, unha vintena
de actos dentro do programa Meninas 2022.
O
acto central será a entrega dos recoñecementos Meninas, que
destacan o labor de persoas e institucións que combaten a violencia
contra as mulleres. Nesta quinta edición do programa recoñeceranse
pola súa loita pola igualdade os equipos Viogen de Galicia da Garda
Civil, a Marcha Mundial das Mulleres, a Asociación de Profesionais
dos Centros de Información á Muller-ASOCIM, o equipo feminino do
Burela Fútbol sala e o Comando Igualdade do IES Alexandre Bóveda de
Vigo. Os recoñecementos entregaranse o vindeiro luns no Hostal dos
Reis Católicos, en Santiago.