Comeza en Santiago o gran evento galego sobre comercio electrónico, CONECOM
xoves, 19 de xuño do 2014
- Imaxe da primeira edición de CONECOM
Este xoves celébrase no
Pazo de Congresos de Santiago unha xuntanza de gran interese para os
nosos profesionais do ámbito TI, pero tamén para calquera
profesional -de calquera sector- que teña previsto iniciar algún
tipo de estratexia innovadora de promoción e vendas no seo da súa
empresa e empregando ferramentas 2.0. Falamos da Conferencia
de Comercio Electrónico CONECOM, un evento que vai pola súa
terceira edición e que nos brinda a oportunidade de participar nun
máis que completo programa de charlas e obradoiros formativos sobre
os máis diversos temas tecnolóxicos. A xornada comeza (9.30) cunha
introdución ao correo electrónico (oportunidades e como levalas a
cabo) a cargo de María del Carmen Fernández (Infinitum Ecommerce) e
Xosé Rivera (DobleClic).
Logo é a quenda de Nacho
de Francisco, de Elogia, que falará sobre técnicas para chegarmos
aos consumidores dunha maneira non intrusiva (inbound marketing).
Jesús Sánchez, de Correos, tomará o relevo arredor das 10.30 horas
para afondar na importancia dunha boa estratexia loxística. Sobre as
11.30 horas, será a quenda de Dolores Diz, de Mas Valor, e logo
intervirán en mesa redonda Innovar é a clave do éxito da nosa
tenda David Salgueiro de Galantiqua, David Pombar de SetPay e
Iván Fociños de IPGlogal. Logo dunha pausa para o xantar, as
actividades proseguirán pola tarde con outra mesa redonda (sobre as
15.00 horas) a cargo de Marcos Pereira de Escompring, Javier
Gómez de TodoTaladros e Fernando Gómez de Predomina. Lalo
García reabrirá a xeira de relatorios arredor das 16.00 cunha
conferencia sobre desenvolvedores de establecementos de venda
dixitais, seguida doutro relatorio a cargo de María del Carmen
Fernández (Infinitum Ecommerce).
Volvendo ao evento
Conecom en termos xerais, dicir que é case con toda probabilidade a
máis importante (e a primeira) de cantas xuntanzas se celebran na
nosa terra arredor da temática do comercio electrónico. Ten por
finalidade, segundo informan os organizadores (DobleClic), formar e
dar as ferramentas de traballo ás PEME e ás novas iniciativas
empresariais no ecommerce para así “crear un sector
competitivo e fortalecer o tecido empresarial galego coa axuda das
institucións e o esforzo de todos”.
Segundo engaden os
impulsores da iniciativa, esta abrangue un amplo abano de nichos,
sectores e temáticas, xa que a cuestión das vendas e as
comunicacións por Internet e polas redes sociais é xa, a día de
hoxe, unha cuestión universal que afecta a tódalas empresas.
“Sectores como a artesanía, a agricultura, a industria e a cultura
galega”, informan, “teñen un gran potencial de comercialización,
pero en moitos casos non atopamos nin os recursos nin a iniciativa
como para saber desenvolvelo e fortalecelo, baleiro que pretendemos
cubrir con CONECOM, rompendo barreiras e instruíndo e capacitando
aos emprendedores nas plataformas tecnolóxicas”.