Comeza a facer ruído a edición cacereña dun dos grandes eventos do software libre: DrupalCamp
venres, 13 de setembro do 2013
Cáceres acollerá os
vindeiros días 26 e 27 de outubro a cuarta edición do que con
probabilidade sexa o maior (cuantitativamente) dos eventos estatais
organizados por e para os seareiros de Drupal. A nova edición da
xuntanza DrupalCamp, antes
celebrada en Barcelona, Sevilla e Madrid, prepárase xa co obxectivo
de subir un novo chanzo no afianzamento da comunidade de usuarios,
desenvolvedores e seareiros do xestor de contidos de código aberto.
Segundo apunta a organización, o número de visitantes e
participantes nas edicións previas foi moi alto, e nada indica que a
convocatoria cacereña vaia achegar cifras menores, máis ben o
contrario, tendo en conta o interese crecente que está a espertar o
software libre en tódalas frontes. Desta volta, contarase
coa presenza da comunidade Drupal de Portugal, xa que existen
varios proxectos que promoven o intercambio cultural e de negocio
entre ambos os países.
Segundo informa
OpenSistemas, unha das
firmas promotoras da xuntanza, “estamos ante un evento no que se
comparte coñecemento, xérase networking, afiánzanse
relacións e achégase unha excelente oportunidade para traballar en
conxunto”.
A organización da
DrupalSpain abriu o prazo de recepción de propostas de charlas até
o próximo 21 de setembro e recomenda que as presentacións estean
baseadas en experiencias e con orientación práctica. Respecto da
temática das charlas, a organización sinala é preferíbel que
estea directamente relacionada con Drupal, aínda que tamén se
aceptan charlas horizontais. Algúns exemplos destas liñas poden
ser: estratexias de negocio, comunidade, frontend/deseño/usabilidade,
escribindo código, experiencia de usuario, site building,
goberno/universidade, open data, xestión de proxectos, etc.
Outras das recomendacións que se dan desde a organización para
orientar mellor as presentacións son respectar os 45 minutos de
duración, evitar promocionarse a un mesmo ou á empresa á que se
representa e identificar a proposta cun título claro e concreto.