Comeza Vindeira Capital Network 2013 poñendo ao alcance dos nosos proxectos 35 millóns de euros en investimento
xoves, 21 de novembro do 2013
- Presentación do foro con Antonio Rodríguez del Corral, do Clúster TIC Galicia; Reyes Leis Rodríguez, do Concello de Santiago; Santiago Novoa, de Novagalicia Banco, e Juan Cividanes, de Xesgalicia
Finalmente dá comezo
este xoves en Santiago o foro Vindeira
Capital Network, organizado polo Cluster TIC de Galicia e de cuxa
presentación dimos
conta onte en detalle. O evento en cuestión, que se desenvolve
en Santiago, diríxese a facilitar o camiño dos nosos emprendedores
TIC cara aos fondos que poderán facer posíbel que os seus proxectos
boten a camiñar. En total, participan no evento dúas ducias de
investidores, entre hoxe e mañá, achegando a posibilidade de
tirarmos partido de 35 millóns de euros. Os proxectos galegos que
participan en Vindeira Capital Network son 15 start-ups do
eido das novas tecnoloxías da información e do software aplicado á
biotecnoloxía.
Dos 15 proxectos que
participan en VCN’’13, nove proceden de Vindeira Venture Academy, a
fase de formación na que participaron 16 propostas preseleccionadas
dun total inicial de 30 candidatos. A estes nove proxectos
súmanselles outro catro orientados ao sector da biotenoloxía e
outros dous convidados que amosan xa un importante grao de maduración
que lles permite acceder de maneira directa ao foro de investimento.
Ademais, outros 19 proxectos serán incluídos tamén no dossier
que se entregará aos investidores participantes en VCN’’13.
Como dixemos onte, a
cuarta edición de Vindeira Capital Network está organizada polo
Clúster TIC Galicia en colaboración con Xesgalicia e conta co
patrocinio de Novagalicia Banco, R e o Concello de Santiago de
Compostela. O foro de investimento de VCN’’13 dá comezo
(oficialmente) este xoves ás 16:30 horas, cun acto de apertura ao
que poderán asistir os medios de comunicación. A continuación, xa
a porta pechada, presentaranse os investidores participantes e
comezarán as presentacións dos proxectos empresariais. A clausura
terá lugar pasadomañá, venres, ás 13 horas, e contará coa
intervención de Mar Pereira Álvarez, directora da Axencia de
Modernización Tecnolóxica de Galicia (AMTEGA). As sesións
desenvolveranse no Hotel AC Palacio do Carme en Santiago de
Compostela.
A continuación damos
conta dos participantes no foro de investimento de VCN’’13 procedentes
de Vindeira Venture Academy.
· Cilenis. Ofrece
solucións e produtos baseados na investigación no procesamento da
linguaxe natural e a enxeñaría lingüística. Desenvolve software
con filosofía de código aberto para ofrecer solucións avanzadas
que melloran o acceso, tratamento e organización do coñecemento.
· Creappcuentos.
Desenvolveu unha aplicación para Android e iOS que permite a
creación de contos ou historias dixitais de forma sinxela e
intuitiva, logrando que nenos e pais interactúen e estimulen a súa
creatividade e maxín empregando unha ferramenta visual e intuitiva.
· Escompring. Puxo en
marcha unha plataforma na que produtores e consumidores poden
comerciar de maneira directa, sen intermediarios nin gastos de
intermediación. Deste xeito, o produtor dispón dunha tenda en liña
sen ter que realizar ningún investimento e o consumidor pode mercar
a prezos de orixe.
· Kiply. Solución que
permite recoller de forma automática información útil e detallada
daqueles traballadores que interactúan decote con dispositivos
electrónicos. Só é preciso instalar un pequeno paquete de software
nos seus dispositivos e comezarase a recompilar información
totalmente confidencial acerca do seu “eu profesional”.
· Neteleven. Desenvolve
software para a obtención de datos estatísticos avanzados de
eventos deportivos en tempo real, con aplicacións específicas para
clubs e equipos profesionais, medios de comunicación e casas de
apostas.
· OSM Lab. Aplica a
tecnoloxía á biomecánica clínica. Implanta laboratorios para a
valoración do dano corporal, a valoración científica dos problemas
músculo-esqueléticos e da ergonomía, a avaliación das posturas e
a análise de cargas.
· Signedoc. Propón ás
empresas un servizo para xestionar e asinar os seus contratos,
pedidos, facturas, e outros documentos, axilizando a súa forma de
enviar e recibir documentación asinada de maneira electrónica. A
través da web úsanse certificados electrónicos para asinar a
documentación.
· Sinaturas. Desenvolve
e comercializa unha solución software para a emisión e xestión de
títulos formativos a través de medios dixitais, o que permite obter
importantes reducións de custos.
· Torus. Traballa en
servizos de computación e comunicacións orientados aos sectores das
finanzas, telecomuniacións, tecnoloxías da información, enerxía,
defensa e industria aeroespacial.
Proxectos do ámbito
da Biotecnoloxía
Bialactis
Detection and Radiation
Technologies (DART)
MD.Use!
AFFINImeter
Proxectos convidados
Tiivii
Gamifik
Investidores
participantes en VCN’’13
Active Venture Partners
Ámbar
Big Sur Ventures
Bullnet
Business In Fact
Caixa Capital Risc
CDTI
Creaventure
DCN / Realiza Business
Angels
Efizenza
Emprende Capital
Enisa
Everis
Faraday Venture Partners
Fundación Bankinter
Fundación Entrecanales
G8 Capital
Inveready
Kibo Ventures
Lanta Capital Ventures
MITEF
Sitka Capital