Comeza Pint of Science con mancheas de charlas científico-tecnolóxicas en Santiago, Lugo, A Coruña e Vigo
luns, 22 de maio do 2023
Este
luns 22 de maio comeza o festival internacional Pint of Science,
que centra esforzos en achegar un novo e revolucionario formato de
divulgación científica (nos establecementos hostaleiros, cun
importante elemento de proximidade e informalidade). Tal
e como sinalamos dende este medio a semana pasada, Pint of Science
conta este ano cunha importante participación galega: haberá
charlas en cinco cidades galegas, impulsadas polas nosas tres
universidades e os seus centros de investigación (por exemplo o
CITIC da UDC ou AtlanTTic da UVigo). Se ben os días pasados
reflectimos o programa da UDC e da UVigo, hoxe
poremos o foco na USC, que organiza sesións en Lugo e Santiago, da
man do CiMUS, o CiQUS ou o CiTIUS, entre outros. O festival
estenderase ao longo dos días 22, 23 e 24 de maio.
En Lugo
A
alfabetización científica contra a desinformación será o
título do relatorio que abra o Pint of Science na cidade de
Lugo. A charla correrá a cargo da investigadora Paloma Blanco Anaya
e desenvolverase, ao igual que o resto de relatorios, a partir das
18.00 horas, na Cafetaría Noroeste. A continuación Montse Pena
Presas abordará as científicas na literatura, mentres que Nerea
Gandoy pechará a sesión do luns 22 con Avatares, mutantes e
amores.
Rosa
Romero Franco profundará no poder das plantas o martes 23. Xusto
despois será a quenda de Gonzalo Fernández Rodríguez, quen
disertará sobre as infeccións en animais. Finalizará a sesión
Antonio Rigueiro co seu relatorio sobre árbores monumentais.
O
Pint of Science botará o peche o mércores 24 coas
intervencións de Ángela González Martínez, Emilio Díaz Varela e
Santiago Pereira Lorenzo. A hiperactividade en cans, unha check
list para montar unha merendola na
Lúa, e os castaños xigantes resilientes en Europa serán os
temas abordados nesta derradeira sesión.
En Santiago
Compostela
acollerá nas mesmas xornadas e novamente a partir das 18.00 horas, a
versión santiaguesa do Pint of Science no bar cafetería
Alborada de Veiga. As persoas que asistan o luns 22 poderán
escoitar charlas distendidas que acometan o desenvolvemento de
fármacos, a posibilidade de que non sexamos tan iguais como cremos,
a vida máis alá da auga ou o chatGPT. Os relatorios correrán a
cargo de Antón Leandro Martínez Rodríguez do Centro Singular de
Investigación en Medicina Molecular e Enfermidades Crónicas da USC
(CiMUS), José Manuel Amoedo Meijide do grupo de investigación ICEDE
(Innovación, cambio estrutural e desenvolvemento), Adrián Sánchez
Fernández do Centro Singular de Investigación en Química Biolóxica
e Materiais Moleculares da USC (CiQUS) e Aldán Creo Mariño do
Centro Singular de Investigación en Tecnoloxías Intelixentes da USC
(CiTIUS).
O
martes 23 Clara Landesa Gómez, investigadora do Instituto Galego de
Física de Altas Enerxías (IGFAE), centro mixto da USC e da Xunta de
Galicia, abordará os primeiros instantes do universo. A
continuación, será a quenda de Francisco Javier Salgado Castro, do
departamento de Bioquímica e Bioloxía Molecular, quen pronunciará
o relatorio O pecado antixénico: a primeira impresión conta.
Completarán a primeira xornada do Pint of Science compostelán
Jeannette Rodríguez Pallares do CiMUS, Borja Aparicio Gil do CiQUS e
Olga Barca Mayo, tamén do CiMUS. Os temas a tratar serán a
rexeneración do cerebro, mirar o universo con gafas fluorescentes ou
por que durmimos.
Na
derradeira das sesións, o mércores 24, intervirán Francisco Javier
Cardama do CiTIUS, Mayra Maritza Quemé Peña do CiQUS, María Pilar
Prieto Martínez do grupo EcoPast, Francesc Yassid Ayyad Limonge do
IGFAE e María José Carreira Nouche do CiTIUS. Novamente o chatGPT,
a necesidade (ou non) de novos fármacos, entre cavernícolas e
romanos, do mundo cuántico ao ollo e o debate actual sobre a
Intelixencia Artificial integrarán a listaxe de temas abordados.
En
Vigo
Esta 8ª edición conta cun bar de Vigo que
acollerá 6 charlas repartidas en 3 días, coa participación de 6
científicos e científicas como relatores (todos/as da Universidade
de Vigo, dous pertencentes ao centro atlanTTic). É un evento
totalmente gratuíto, e o programa completo, con enderezos de bares,
temáticas e horarios, xa se pode consultar na
web de Pint of Science. O festival en Vigo tratará
temas de actualidade como a Intelixencia Artificial ou as tecnoloxías
fotónicas. Nos diferentes eventos desta edición haberá
experimentos, demostracións en vivo, actividades e premios. O bar no
que se realizarán as charlas será o Bar Cañaveral (Porta do Sol,
6, Vigo).
Nesta edición participarán relatores e relatores de
centros de investigación, universidades e entidades da comunidade
científica como o Centro de Investigación en Tecnoloxías de
Telecomunicación, atlanTTic; o Centro de Investigación Mariña,
CIM, e o Centro de Investigación en Tecnoloxías, Enerxía e
Procesos Industriais, CINTECX, todos eles pertencentes á
Universidade de Vigo (UVigo), ou a Universidade do Minho (Portugal).
Entre os e as protagonistas: José Lorenzo Alonso Gómez coa súa
charla ¿Moléculas quirales para H2 verde?, Paloma Morán
Martínez con El viaje del salmón y cómo podemos protegerlo
ou Felipe Gómez Cuba con Chocolate, Wi-Fi e buracos negros.
O programa completo xa
se pode consultar na web.
Na Coruña
Na
Coruña serán dous bares da cidade os que contarán coas
intervencións de 12 científicos e científicas, na súa maioría
investigadores da UDC. Trátase do Bar Árnica, na rúa de Herrerías,
2, e La Olímpica Bar en Alfredo Vicenti, 39, os días mencionados a
partir das 20 horas.
Os temas que tratarán nesta edición van
dende a Intelixencia Artificial, a epixenética da transexualidade,
as células artificiais ou os coches que funcionan con hidróxeno.
As
xornadas distribuiranse do seguinte xeito:
O día 22 no Bar
Árnica terán a quenda Roberto Brea, do CICA (Centro
Interdisciplinar de Química e Bioloxía), que falará de Células
artificiais á carta: creando vida no laboratorio, e Verónica
Bolón, do CITIC (Centro de Investigación en Tecnoloxías da
Información e da Comunicación), que contará Por que aínda non
lle debemos temer aos robots.
O mércores 23 será Socorro
Castro, do CICA, quen explicará Como funciona un coche de
hidróxeno e Ángel D. Arós Rodríguez, da UDC, sorprenderá a
todos cunha exposición que leva por título “Todos os soles, á
vez, en todas partes”.
Xa o día 24 Vicente Díaz Casás
do CITENI (Centro de Investigación en Tecnoloxías Navais e
Industriais) achegaranos á Enerxía do Mar, a Eólica mariña e
Rosa María Fernández García do CICA cuestionarase se Existe un
xen da transexualidade, entre moitas outras sorpresas.
Pola
súa banda La Olímpica Bar acollerá como sesións inaugurais o día
22 a Alicia L. Bruzos, do University College of London, que nos
contará A viaxe submarina dunha célula de cancro, e a
Manuel Herrador, do CITEEC (Centro de Innovación Tecnolóxica en
Edificación e Enxeñería Civil), cunha intervención que leva por
título A miña casa é de plástico!
O martes 23
tocaralles a José Luis Pardo Vázquez, do CICA, que nos explicará
Que pasa no cerebro cando se toma unha decisión?, e a
Gloria González Fortes, do Instituto Universitario de Xeoloxía
Isidro Parda Pondal, coa exposición Tal como éramos: un retrato
xenético dos nosos antepasados.
Xa para rematar, o día 24
clausurarán o festival Jesica Asatryan, do CITENI, quen explicará a
razón pola que Os fotóns son caros e Francisco Alonso
Tajes, da UDC, coa charla Rafa Nadal e Usain Bolt: campións de
pés de barro?
O evento é de carácter gratuíto, e o
programa completo pode consultarse na web:
https://pintofscience.es/events/coruna.
Científicos e científicas españolas enchen bares e
cidades de ciencia
A edición 2023 do Festival de
Divulgación Científica Pint of Science será a 8ª que
acolla España. Durante a súa celebración, os bares das nosas
cidades converten, durante eses tres días, en improvisados
laboratorios que amosarán á clientela habitual e a tódalas persoas
interesadas, os avances máis recentes da ciencia en España.
57
localidades repartidas por toda a xeografía darán a saída á
edición 2023 o próximo luns 22 de maio, celebrándose de maneira
simultánea máis de 500 charlas divididas en 300 eventos de entrada
totalmente gratuíta. “Ver crecer esta iniciativa, vivir a
experiencia nos bares, a transformación do público, e contar con
grandes poñentes, fan grande a Pint of Science e a todo os
que forman parte del”, afirma Ana Peña, responsábel de
comunicación da edición, que engade que “pensamos que o principal
interesado é o público xeral, pero os científicos son os primeiros
aos que lles ilusiona a iniciativa e mostran interese en contar o seu
traballo, sendo protagonistas de levar a ciencia á sociedade”.
Nunha linguaxe comprensíbel e próxima, o persoal investigador máis
punteiro do panorama nacional falará sobre proxectos das áreas máis
variadas, de Neurociencia a Astrofísica, de Medicina a Historia, de
Supercomputación a Matemáticas, de Economía a Zooloxía.
Pint
of Science no mundo
Son 26 os países que
este ano compoñen o gran equipo encargado de encher bares e locais
coa investigación científica máis actual do planeta Terra. Os
compañeiros australianos serán os primeiros en abrir a persiana dos
bares e en brindar polo coñecemento e a súa correcta divulgación.
Con eles e co resto de países anfitrións, comezará un maratón de
3 días de ciencia e bares.
Un ano máis, Pint
of Science é unha realidade
Pint of
Science naceu en maio de 2013 en Reino Unido, cando dos
investigadores: Michael Mostkin e Praveen Paul organizaron un evento
nos seus laboratorios co fin de mostrar a investigación que
realizaban as persoas afectadas por distintas enfermidades mentais.
Eles mesmos comprobaron a gran repercusión que tivo neses pacientes,
e así pensaron, si a xente vai á ciencia… por que non levar a
ciencia ao lugar onde está a xente? Os bares. Pouco se imaxinaban
que uns anos despois, este ben chamado festival, daría a volta ó
mundo.
Ademais, PoS 2023 non sería posíbel sen a colaboración
de organizacións que patrocinan o festival e que facilitan que sexa
gratuíto como FMC Agricultural Solutions e Vadillo Asesores a nivel
nacional.