Collen impulso os robots amigábeis para a xente maior do proxecto galego NETA V3A
xoves, 26 de decembro do 2019
Os
días
pasados presentáronse no Espazo+60 de Afundación (Abanca) os máis
recentes detalles do proxecto NETA V3A, co-impulsado pola empresa
compostelá Balidea, co obxectivo de achegar dispositivos
tecnolóxicos robóticos que acompañen o envellecemento activo e
velen pola práctica de hábitos saudábeis, a autonomía e
independencia entre as persoas idade. Segundo fixeron saber as
empresas impulsoras de NETA no reconto de fitos acadados, ao longo de
2019 levouse a cabo a definición conceptual do robot do proxecto,
concretamente o seu deseño visual e morfolóxico.
Tamén
se encarou o desenvolvemento das interfaces software e dos módulos
de interacción por voz que permitirán aos usuarios acceder ás
distintas funcionalidades tanto en castelán como en galego. Para
estes fitos, lembraron, contouse coa colaboración de Afundación e
os socios voluntarios do Espazo+60, que achegaron a súa experiencia
vital e profesional para dar forma ao corpus conversacional e á
conteptualización de NETA, sen do obxectivo final (en parte
conseguido) materializar “un robot afastado de estereotipos”. Na
seguinte fase construirase o primeiro prototipo co obxectivo de
realizar os pilotos durante o verán e poder presentalo a finais de
2020.
NETA
V3A é como dixemos unha iniciativa de I+D+i que busca achegar
solucións tecnolóxicas para mellorar a calidade de vida dos adultos
maiores, no marco da convocatoria Conecta PEME da Axencia Galega de
Innovación (GAIN). Á fronte de NETAV3A están as empresas Atendo,
Balidea, Fruto DS e Ledisson AIT, con Gradiant como centro
tecnolóxico asociado. Propoñen robótica social, asistencia por
voz, gamificación e Intelixencia Artificial con vistas a ter
entre mans “unha solución tecnolóxica respectuosa e que apoie a
cada persoa no desenvolvemento do seu plan de vida”, informaron,
engadindo que o marco de traballo foi o modelo da Atención Centrada
na Persoa (ACP), xa que este baséase no respecto á singularidade e
as decisións persoais.
Os
logros, polo miúdo
Tal
e como comentaron as empresas desenvolvedoras con máis detalle, no
2019 definíronse as funcionalidades e requisitos de NETA V3A, así
como o seu plan de probas. Así mesmo, están a finalizarse as
accións de definición conceptual do robot, concretamente o seu
deseño visual e morfolóxico. Amais, avanzouse nas actividades de
deseño e desenvolvemento da plataforma tecnolóxica asociada,
principalmente as relacionadas coa creación do corpus
conversacional, a implementación do bot conversador, o deseño da
arquitectura da plataforma, o deseño da interface robótica e a
aplicación da plataforma asistencial. Realizáronse outras
actividades correspondentes ao deseño e desenvolvemento do robot,
como o estudo de requirimentos técnicos que non cumpre o robot
social estándar, o estado da arte dos módulos externos a engadir, o
deseño da carcasa do robot, a fabricación do prototipo desta e o
deseño interno.