Colle impulso a fase primeira do proxecto de fibra óptica para a zona vella de Santiago
martes, 6 de outubro do 2020
O
Concello de Santiago, a través da Comisión Asesora do Patrimonio
Histórico que preside a edil de Urbanismo Mercedes Rosón, informou
favorabelmente da fase primeira do proxecto para levar conexión
avanzada (fibra óptica) para a contorna histórica da cidade.
Trátase, como recordaremos, do Proxecto de infraestrutura
para o despregamento de Rede FTTH Orange/Jazztel na cidade histórica
de Santiago de Compostela. A
fase primeira pon o foco na rúa do Franco e máis na rúa do Vilar
(34-84) e conta cun orzamento de execución material de
39.946,95 euros.
A
proposta que foi elixida veu da man de Orange. Nela incluíronse
condicións como a relativa á rede de dispersión (os cables de
acometida para a clientela deberán acceder ás unidades
inmobiliarias a través do portal e dos elementos comúns interiores
dos edificios, non sendo autorizábel o acceso ás vivendas e locais
a través das ventás) ou a que se refire ás pegadas nas fachadas
(co fin de reducir o impacto visual da instalación as novas Caixas
Ópticas Terminais (CTO) terán de maneira preferencial un acabado en
cor gris, en lugar de negro, para “integrarse o mellor posíbel nos
paramentos de granito”). Ademais especifícase que o trazado dos
pasos de rede de rede soterrados deberán deseñarse sempre “seguindo
a aliñación das lousas de granito da cidade histórica, e de acordo
co criterio de afectar ao menor número de pezas orixinais”; e que
as tapas das novas arquetas faranse con lousa de granito das mesmas
características cás existentes no pavimento, e co grosor necesario
para garantir o tráfico de vehículos pola superficie. Por outra
banda, a obra civil correspondente á execución de pasos soterrados
da nova rede de distribución de fibra óptica “deberá ser
aproveitada para soterrar simultaneamente todos aqueles tendidos
aéreos que poidan ser suprimidos”.