Científicos desenvolven unha tecnoloxía que le as intencións das persoas antes de que actúen
luns, 12 de febreiro do 2007
Nestes tempos en que case ninguén dubida da eficacia e da rigorosidade científica das máquinas da verdade que saen nos programas de lercheo de televisión, o impacto dun desenvolvemento que permite anticipar os movementos dun individuo antes de que actúe, non semella sorprendernos moito. Porén, ó invento que imos comentar non lle falta interese, e case semella unha das moitas predicións cumpridas do escritor Phillip K. Dick, autor de O informe da minoría (Minority Report) ou Soñan os androides con ovellas eléctricas?. Segundo informou os días pasados The Guardian, o aparello diríxese cara ós pensamentos da persoa á que estea conectado para, a través dun escáner de análises cerebrais, atopar e interpretar a mensaxe que probablemente teña ficado até o de agora máis na escuridade: a dos plans segredamente trazados para o minuto, hora ou día seguinte.
Segundo declaracións de John Dylan (o responsable do estudo) ó dito xornal, “o emprego do escáner é como acender unha luz e ver o que está escrito”. Os científicos que forman parte do proxecto pertencen ó Instituto de Ciencias Cerebrais e Cognición Humana Max Planck de Alemaña, en colaboración con membros do University College de Londres ou a Universidade de Oxford. Xuntos foron quen de localizar unhas pautas de actividade cerebral que posteriormente foron quen de trasladar á linguaxe dos pensamentos coherentes.
O seu traballo baséase en investigacións xa elaboradas de imaxes do cerebro en distintos estados de ánimo e xerando diferentes pensamentos, aproveitando sobre todo aqueles máis vinculados á mentira, á violencia ou ós prexuízos raciais.