Científicos atopan un novo xeito de buscar vida extraterrestre por medio das ondas de radio e televisión
luns, 8 de xaneiro do 2007
Os astrónomos, tras longos e fracasados intentos de
atopar vida intelixente noutros planetas, a base de enviar de xeito deliberado
mensaxes ó espazo que nunca foron contestadas (que nós saibamos, claro), cambian
agora de táctica, e tal e como vén de informar o Centro Harvard-Smithsoniano
de Astrofísica, van procurar agora sinais de emisións de televisión e outras
ondas que confirmen a existencia de calquera civilización que habite en preto de
1.000 estrelas.
No proxecto, previsto para primeiros de 2008, empregarase un novo radiotelescopio
para buscar tráfico de radio similar ó que se atopa na terra e con este
aparello explorarase unha porción do espectro electromagnético empregado no
noso planeta para propósitos máis de andar “por casa”, como o radar, a
televisión e as emisións de radio en FM.
Grazas á nova iniciativa, poderanse detectar
sinais semellantes ás da nosa radio a unha distancia de 30 anos luz. Deste
xeito, recibiranse ondas de “persoas que
nunca tiveron a intención de que nós as escoitáramos e teremos un indicio de
que algo está a pasar”. Así o aseguraba David Aguilar, o director de
comunicacións do Centro de Astrofísica.
